అర్జున్ ని అప్పుడైనా టైంకి వదులుతారా?

ముందు అనుకున్న ప్లానింగ్ ప్రకారం వెళ్లుంటే ఈపాటికే థియేట్రికల్ రన్ పూర్తి చేసుకుని శాటిలైట్ దాకా వచ్చేది నిఖిల్ నటించిన అర్జున్ సురవరం. వదిలితే పారిపోయే భేతాళుడిలా దీని విడుదల సంగతి ఎంతకీ తేలడం లేదు. అదుగో పులి ఇదుగో తోక తరహాలో డేట్లు మారుస్తున్నారు తప్ప ఫైనల్ గా లాక్ చేయడం వదిలేస్తున్నారు. నిఖిల్ కూడా దీని విషయం మొన్నటిదాకా సీరియస్ గా తీసుకున్నాడు కాని ఇప్పడది తన చేయి దాటిపోయి నిర్మాత సోలో వ్యవహారంగా మారిపోవడంతో మౌనాన్ని ఆశ్రయించాడు.

ఇంతా కష్టపడి ఏడాది పైగా షూటింగ్ చేసి ఒళ్ళు హూనం చేసుకున్నా ఇలాంటి జాప్యం జరిగితే ఏ హీరో కైనా బాధ కలిగించే విషయమే. అందులోనూ అభిమానులు ఎన్నో అంచనాలు పెట్టుకున్న సినిమాకు ఇలా జరగడం ఊహించనిదే. తాజా అప్ డేట్ ప్రకారం అర్జున్ సురవరం రిలీజ్ ఆగస్ట్ నెలాఖరుకు ప్లాన్ చేశారట. మొదటి మూడు వారాలు వరసగా క్రేజీ సినిమాలు షెడ్యూల్ అయ్యి ఉన్నాయి కాబట్టి ఆ టైం అయితేనే సేఫ్ గా ఉంటుందని భావిస్తున్నారట. నిఖిల్ మాత్రం కార్తికేయ 2 చేయడాన్ని చేయడాన్ని టార్గెట్ గా పెట్టుకున్నాడు.  కాని దర్శకుడు చందూ మొండేటి ఆల్రెడీ శర్వానంద్ కు కమిట్ మెంట్ ఇచ్చాడు కాబట్టి అది పూర్తయితే తప్ప కార్తికేయ 2కు రాలేడు. ఇది తేలేందుకు టైం అయితే పడుతుంది

అందుకే అర్జున్ సురవరం రిలీజ్ గురించి టెన్షన్ పెట్టుకోకుండా కొత్త సినిమాల చర్చలలో బిజీ కావాలని నిఖిల్ నిర్ణయించుకున్నట్టు తెలిసింది. ఒకవేళ అర్జున్ సురవరం అన్ని పక్కాగా సెట్ చేసుకుని విడుదల తేది ప్రకటిస్తే అప్పుడు ప్రమోషన్ లో యాక్టివ్ గా మారాలని ప్లాన్ చేసుకున్నాడట. మరి ఈసారైనా కొత్త టైంకు అర్జున్ సురవరం వస్తాడో రాడో వేచి చూడాలి. మరోపక్క శ్వాస అనే మూవీ కూడా ఆగిపోయింది. ఇప్పటికిప్పుడు కార్తికేయ 2 స్టార్ట్ అయ్యే ఛాన్స్ లేదు కాబట్టి నిఖిల్ ఏ దర్శకుడు ఏ బ్యానర్ లో చేయబోతున్నాడు అనేది ప్రస్తుతానికి సస్పెన్స్ గానే ఉండబోతోంది