RRR స్టార్ల‌ను పంచుకున్న పందెం కోళ్లు!

సంక్రాంతి బ‌రిలో పందెం పుంజుల్లా పోటీ ప‌డుతున్నారు మ‌హేష్‌- అల్లు అర్జున్. ఆ ఇద్ద‌రి సినిమాల మ‌ధ్య తీవ్ర‌మైన పోటీ నెల‌కొంది. మ‌హేష్‌- స‌రిలేరు నీకెవ్వ‌రు జ‌న‌వ‌రి 11న రిలీజ‌వుతుండ‌గా.. బ‌న్ని- అల వైకుంఠ‌పుర‌ములో చిత్రం జ‌న‌వ‌రి 12న రిలీజ‌వుతోంది. ఆ క్ర‌మంలోనే ప్ర‌చార బ‌రిలో నువ్వా నేనా? అనే పోటీ క‌నిపిస్తోంది. ఎవ‌రికి వారు ప‌బ్లిసిటీ ప‌రంగా కొత్త ఎత్తుగ‌డ‌ల‌తో దూసుకుపోతున్నారు. ఇక ప్రీరిలీజ్ వేదిక‌ల విష‌యంలోనూ ఒక‌రితో ఒక‌రు పోటీప‌డ‌బోతున్నార‌ని తాజా స‌న్నివేశం చెబుతోంది.

ఇప్ప‌టికే మ‌హేష్ - అనీల్ రావిపూడి టీమ్ స‌రిలేరు నీకెవ్వ‌రు ప్రీరిలీజ్ వేడుక కోసం మెగా హీరోల్ని రంగంలోకి దించుతున్నార‌ట‌. మెగాప‌వ‌ర్ స్టార్ రామ్ చ‌ర‌ణ్ కానీ మెగాస్టార్ చిరంజీవి కానీ జ‌న‌వ‌రి 5న జ‌ర‌గ‌నున్న ప్రీరిలీజ్ వేడుక‌కు ముఖ్య అతిధిగా విచ్చేస్తార‌ని ఇప్ప‌టికే ఆ ఇద్ద‌రినీ స‌రిలేరు టీమ్ సంప్ర‌దించింద‌ని వార్త‌లొచ్చాయి. మ‌హేష్ కోసం చిరు-చ‌ర‌ణ్ వ‌స్తే బ‌న్ని కోసం ఎవ‌రు వ‌స్తారు? అంటూ అప్పుడే ఫ్యాన్స్ లో చ‌ర్చ మొద‌లైంది.

ఇంత‌లోనే బ‌న్ని ఫ్యాన్స్ కి కూడా గుడ్ న్యూస్ అందింది. స‌రిలేరు ఈవెంట్ త‌ర్వాత బ‌న్ని అల వైకుంఠ‌పుర‌ములో ఈవెంట్ ని భారీగా ప్లాన్ చేస్తున్నారు. ఈ వేడుక‌కు యంగ్ టైగ‌ర్ ఎన్టీఆర్ ముఖ్య అతిధిగా విచ్చేయ‌నున్నార‌ట‌. ఇక తార‌క్ ఇంత‌కుముందు మ‌హేష్ కోసం భ‌ర‌త్ అనే నేను ఈవెంట్ కి వెళ్లారు. ఈసారి బ‌న్ని కోసం విచ్చేస్తున్నార‌న్న‌మాట‌. ఇప్ప‌టికే అతిధుల‌కు ఆహ్వానాలు అందాయిట‌. మ‌రోవైపు ఆర్.ఆర్.ఆర్ చిత్రీక‌ర‌ణ‌లో బిజీగా ఉన్న తార‌క్- చ‌ర‌ణ్ ఇద్ద‌రినీ ఆ ఇద్ద‌రూ లాక్ చేసేస్తుండ‌డం ఆస‌క్తిని రేకెత్తిస్తోంది. చెరో గెస్ట్ ని లాక్కుంటున్నారు. పైగా ఆర్.ఆర్.ఆర్ చిత్రంతో పాన్ ఇండియా స్టార్లుగా ఆ ఇద్ద‌రికీ పాపులారిటీ ద‌క్క‌నుంది. ఈ నేప‌థ్యంలో ఇరు వేదిక‌ల‌పై ఆ ఇద్ద‌రి ప్ర‌చారం క‌లిసొస్తుందేమో చూడాలి.