నాలుగుతో పూజాకి పూర్వ వైభవం దక్కేనా?

సినిమా ఇండస్ట్రీలో ఒక్కో హీరోయిన్‌ రెండు దశాబ్దాలు అవుతున్నా వరుసగా సినిమాలు చేస్తున్న దాఖలాలు చాలానే ఉన్నాయి. ఒక్కసారి స్టార్‌డం దక్కించుకున్న హీరోయిన్స్‌ ఏళ్లకు ఏళ్లు సినిమాల్లో కొనసాగుతూ వెళ్తున్నారు. మధ్యలో కొన్ని ఫ్లాప్స్ పడ్డా, ఒడిదొడుకులు ఎదుర్కొన్నా ఇండస్ట్రీలో స్టార్‌డంతో కొనసాగుతున్నారు. కానీ పూజా హెగ్డే మాత్రం ఇండస్ట్రీలో అడుగు పెట్టిన కొంత కాలంకే దాదాపు కనిపించకుండా పోయింది. అనూహ్యంగా మరోసారి ఈ అమ్మడు తన అదృష్టం పరీక్షించుకునేందుకు ఏకంగా నాలుగు సినిమాలతో ఈ ఏడాది ప్రేక్షకుల ముందుకు వచ్చేందుకు రెడీ అయ్యింది.

గత ఏడాది ఒక్క సినిమాతోనూ పూజా హెగ్డే ప్రేక్షకుల ముందుకు రాలేదు. 2023లో కేవలం ఒకే ఒక్క హిందీ సినిమాతో వచ్చింది. ఆ సినిమా కూడా పెద్ద విజయాన్ని సొంతం చేసుకోలేదు. మొత్తానికి ఈమెకు గత రెండు మూడు సంవత్సరాలుగా బ్యాడ్‌ టైం నడుస్తోంది. పూజా హెగ్డే కెరీర్ ఖతం అయ్యిందని భావిస్తున్న సమయంలో చాపకింద నీరులా మెల్లగా మళ్లీ బిజీ అయ్యింది. ప్రస్తుతం ఈ అమ్మడి చేతిలో నాలుగు సినిమాలు ఉన్నాయి. అందులో మొదటగా 'దేవా' సినిమాతో నేడు ప్రేక్షకుల ముందుకు వచ్చింది. ఈ బాలీవుడ్‌ సినిమాపై పూజా హెగ్డే చాలా ఆశలు పెట్టుకుని ప్రమోషన్స్‌లో పాల్గొన్న విషయం తెల్సిందే.

షాహిద్‌ కపూర్‌ హీరోగా నటించిన ఈ హిందీ సినిమాతో బాలీవుడ్‌లో రీ ఎంట్రీ ఇచ్చిన పూజా హెగ్డే ఆ తర్వాత బ్యాక్ టు బ్యాక్‌ సినిమాలతో ప్రేక్షకుల ముందుకు రాబోతుంది. దేవా సినిమా ఫలితంపై ఈమె బాలీవుడ్‌ కెరీర్‌ ఆధారపడి ఉంటుంది. ఇటీవలే ఈ అమ్మడు తమిళ్‌ స్టార్‌ హీరో సూర్యతో కలిసి 'రెట్రో' సినిమాలో నటించేందుకు కమిట్‌ అయ్యింది. కార్తీక్ సుబ్బరాజ్ దర్శకత్వంలో రూపొందుతున్న ఈ సినిమాపై అంచనాలు భారీగా ఉన్నాయి. తమిళ్‌లో రూపొంది పాన్ ఇండియా రేంజ్‌లో రెట్రో సినిమా రిలీజ్ కాబోతున్న విషయం తెల్సిందే. అన్ని వర్గాల ప్రేక్షకులను అలరించే విధంగా ఈ సినిమా ఉండబోతుంది అనే నమ్మకంను ఫ్యాన్స్ వ్యక్తం చేస్తున్నారు.

తమిళ్‌ సూపర్‌ స్టార్‌ విజయ్‌తో కలిసి ఈమె నటిస్తున్న జన నాయగన్‌ సినిమా సైతం అంచనాలను భారీగా కలిగి ఉంది. తమిళ్‌లో రెండు సినిమాలు చేస్తున్న ఈ అమ్మడు హిందీలోనూ రెండు సినిమాలు చేస్తోంది. అందులో దేవా సినిమా నేడు విడుదల కావడంతో ప్రస్తుతం ఈమె చేతిలో మూడు సినిమాలు ఉన్నాయి. ఈ సినిమాల ఫలితాన్ని బట్టి పూజా హెగ్డేకి పూర్వ వైభవం దక్కుతుందా అనేది తేలిపోయే అవకాశాలు ఉన్నాయి. ఈ నాలుగు సినిమాల్లో కనీసం రెండు మూడు సూపర్‌ హిట్ అయినా పూజా హెగ్డే మరో నాలుగు ఐదేళ్ల పాటు సినిమా ఇండస్ట్రీలో బిజీగా సినిమాలు చేసే అవకాశాలు ఉన్నాయంటూ సినీ విశ్లేషకులు అభిప్రాయం వ్యక్తం చేస్తున్నారు.