గ్యారేజ్ లో ఎన్టీఆర్ జోక్యం ఎక్కువైందా?

సాధారణంగా సినిమా విషయంలో స్టార్ హీరోల జోక్యం - చొరవ ఎక్కువగానే ఉంటుంది. కేరక్టర్లు - టెక్నీషియన్ల ఎంపిక నుంచి దర్శకత్వం వరకూ ప్రతీదాంట్లోనూ వేలు పెట్టేయడం స్టార్ హీరోలకు ఆనవాయితీ. ఇప్పుడు జూనియర్ ఎన్టీఆర్ కూడా జనగా గ్యారేజ్ లో ఎక్కువగా చొరవ చూపిస్తున్నాడని అంటున్నారు. అయితే ఇది తనకు సంబంధం లేని ఓ డిఫరెంట్ విభాగంలో కావడం ఆశ్చర్యకరం.

ఓ నిర్మాణ సంస్థ వరుసగా హిట్స్ ఇస్తూ ఉంటే.. ఆ సంస్థకు డిస్ట్రిబ్యూటర్లు - బయ్యర్లు.. వరుసగా ఒకే గ్రూప్ ఉంటూ ఉంటారు. మైత్రి మూవీ మేకర్స్ వరుసగా హిట్ చిత్రాలు అందిస్తుండడం, గత మూవీ శ్రీమంతుడు రికార్డులన్నిటినీ తుడిచిపెట్టేయడంతో.. డిస్ట్రిబ్యూటింగ్ లో తనకంటూ ఓ సొంత గ్రూప్ ఏర్పాటు చేసుకుంది. జనతా గ్యారేజ్ హక్కులను తమవారు అనుకున్నవారికి ఇచ్చేందుకు మాత్రం వీలుపడ్డం లేదట. దీనికి కారణం జూనియర్ ఎన్టీఆర్ అని తెలుస్తోంది.

తను చెప్పిన డిస్ట్రిబ్యూటర్లకే ఆయా ఏరియాల హక్కులు ఇవ్వాలంటూ నిర్మాతలకు చెబుతున్నాడట ఎన్టీఆర్. ఈ విషయంలో ఒత్తిడి తెచ్చేందుకు కూడా వెనకాడ్డం యంగ్ టైగర్ లేదట. దీంతో తప్పనిసరిగా తమ గ్రూప్ ని వదులుకుని.. జూనియర్ చెప్పినవారికే అమ్మాల్సిన పరిస్థితి వచ్చింది మైత్రీ మూవీ మేకర్స్ కి.