ఎన్టీఆర్ కోసం ఆయ‌న తండ్రి హ‌రికృష్ణ మ‌రోసారి మేక‌ప్ వేసుకోబోతున్నాడా? కొర‌టాల శివ చెబుతున్న ఆ ప్రముఖ న‌టుడు హ‌రికృష్ణేనా? ఈ ప్ర‌శ్న‌ల‌కు అవున‌నే స‌మాధాన‌మే వినిస్తోంది. కొర‌టాల శివ దర్శకత్వంలో ఎన్టీఆర్ క‌థానాయ‌కుడిగా న‌టించ‌నున్న ఓ కొత్త సినిమా ఇటీవ‌లే మొద‌లైంది. అందులో ఎన్టీఆర్ తో పాటు ఓ ప్రముఖ న‌టుడు న‌టించ‌బోతున్నాడ‌ని, ఆ వివ‌రాల్ని త్వ‌ర‌లోనే ప్ర‌క‌టిస్తామ‌ని ద‌ర్శ‌కుడు కొర‌టాల వెల్ల‌డించాడు. ఆ ప్రముఖ న‌టుడు నంద‌మూరి హ‌రికృష్ణ అని తాజాగా ఫిల్మ్‌ న‌గ‌ర్‌ లో ప్ర‌చారం మొద‌లైంది. హ‌రికృష్ణ ఆ మ‌ధ్య త‌ర‌చుగా తెర‌పై క‌నిపించేవారు. కానీ అనారోగ్య కార‌ణాల‌తో కొన్నాళ్లుగా సినిమాల‌కి దూరంగా ఉంటున్నారు. అయితే ఎన్టీఆర్ మాత్రం త‌న తండ్రితో క‌లిసి న‌టించాల‌ని ఎప్ప‌ట్నుంచో అనుకొంటున్నాడు. ఆ కోరిక `నాన్న‌కు ప్రేమ‌తో` సినిమాతోనే నెర‌వేరుతుంద‌ని ఆశ‌ప‌డ్డాడ‌ట ఎన్టీఆర్.కానీ ఆ సినిమాకి కూడా కుద‌ర్లేదు. అయితే కొర‌టాల శివ సినిమాలో మాత్రం న‌టించేందుకు ఒప్పుకొన్న‌ట్టు తెలిసింది. ఇందులోనే క‌ళ్యాణ్‌ రామ్ కూడా క‌నిపించొచ్చ‌ని ప్ర‌చారం సాగుతోంది. మ‌రి అందులో నిజ‌మెంతో తెలియాల్సి వుంది. ర‌చ‌యిత వ‌క్కంతం వంశీ దర్శకత్వంలో ఎన్టీఆర్ న‌టించ‌నున్న కొత్త సినిమాలో మాత్రం క‌ళ్యాణ్‌ రామ్ ప‌క్కాగా న‌టించ‌బోతున్నాడ‌ట. అందుకోసం ఓ క్యారెక్ట‌ర్‌ ని కూడా సృష్టించిన‌ట్టు తెలిసింది. కొర‌టాల శివ సినిమాలో కూడా ఆ అవ‌కాశం ఉండ‌టంతో అందులోనూ న‌టించేందుకు క‌ళ్యాణ్‌ రామ్ ఒప్పుకొన్న‌ట్టు తెలుస్తోంది. తండ్రి, ఇద్ద‌రు త‌న‌యులు క‌లిసి న‌టిస్తే ఇక అభిమానుల‌కు అంత‌కంటే ఆనందం మ‌రేముంటుంది?! మైత్రీ మూవీస్ సంస్థ నిర్మిస్తున్న ఈ చిత్రం జ‌న‌వ‌రిలో సెట్స్‌ పైకి వెళ్లబోతోంది.