'జయం' హిట్ అయిన వెంటనే ఆఫర్లేమీ రాలేదు: హీరోయిన్ సదా

వెండితెరపై కథానాయికగా కనిపించిన తొలి చిత్రంతోనే విజయాన్ని అందుకోవడం చాలా తక్కువమంది విషయంలో జరుగుతుంటుంది. ఆ తక్కువమందిలో 'సదా' పేరు కూడా కనిపిస్తుంది. 'జయం' సినిమా ద్వారా తెలుగు తెరకి సదా పరిచయమైంది. ఆ సినిమాతో ఒక్కసారిగా ఆమె యూత్ హృదయాలను కొల్లగొట్టేసింది. ఆ తరువాత తెలుగుతో పాటు తమిళ .. కన్నడ సినిమాలు కూడా చేసింది. తాజాగా ఆమె 'ఆలీతో సరదాగా' కార్యక్రమంలో తన కెరియర్ కి సంబంధించిన అనేక విషయాలను గురించి ప్రసావించింది.  

"నేను పుట్టిపెరిగింది 'రత్నగిరి'లో .. ముంబై - గోవా హైవేలో ఈ టౌన్ తారసపడుతుంది. మా ఫాదర్ డాక్టర్ ... మదర్ ఓ గవర్నమెంట్ ఆఫీసులో పనిచేసేవారు. మొదటి నుంచి కూడా సినిమాల పట్ల .. నటన పట్ల నాకు ఆసక్తి ఎక్కువగా ఉండేది. అందువలన ఆ దిశగానే అడుగులు వేశాను. మా మదర్ కూడా నన్ను ప్రోత్సహించింది. సినిమాల్లో అవకాశాల కోసం కొన్ని ఫొటోలు దిగాను .. అవి అంత బాగా రాలేదు కూడా. ఆ ఫొటోలు వెళ్లి తేజగారి చేతిలో పడటంతో, నా కోసం ఆయన ముంబై వచ్చారు. 'జయం' సినిమాలో హీరోయిన్ కోసం ఆయన కొత్త అమ్మాయిలను చూస్తున్నారని తెలిసింది.

నన్ను చూడగానే తేజ గారు .. 'జయం' సినిమాకి నేనే హీరోయిన్ అనేశారు. ఆడిషన్ ఇవ్వమని కూడా ఆయన అడగలేదు. అలా 'జయం' సినిమాతో తెలుగు తెరకి పరిచయం అయ్యాను. ఆ సినిమాలో 'వెళ్లవయ్యా .. వేళ్లూ' అనే డైలాగ్ బాగా పాపులర్ అయింది. తేజగారు అనుకున్నట్టుగా ఆ డైలాగ్ చెప్పడానికి నేను చాలా కష్టపడవలసి వచ్చింది. 'జయం' సినిమా సూపర్ హిట్ అయింది .. అయినా ఆ వెంటనే అవకాశాలు రాకపోవడంతో నేను షాక్ అయ్యాను. ఆ తరువాత నిదానంగా ఒక్కొక్కటిగా అవకాశాలు రావడం మొదలయ్యాయి" అని చెప్పుకొచ్చింది.