సీనియర్‌ హీరోతో పలాస దర్శకుడి మూవీ!

ఈ ఏడాది ఆరంభంలో విడుదల అయిన ‘పలాస 1978’ చిత్రం విమర్శకుల ప్రశంసలు దక్కించుకోవడంతో పాటు విపత్తు సమయంలో కూడా ఒక మోస్తరుగా వసూళ్లు రాబట్టి నిర్మాతలకు ఆర్థికంగా మంచి ఫలితాన్ని అందించింది. థియేటర్లతో పాటు డిజిటల్‌ ప్లాట్‌ ఫామ్‌ మీద కూడా మంచి విజయాన్ని సొంతం చేసుకున్న పలాస చిత్రంతో దర్శకుడు కరుణ కుమార్‌ క్రేజ్‌ దక్కించుకున్నాడు. పలాస విడుదల సమయంలోనే కరుణ కుమార్‌ తో సినిమా చేయబోతున్నట్లుగా అల్లు అరవింద్‌ ప్రకటించి అడ్వాన్స్‌ కూడా చేతుల్లో పెట్టాడు.

పలాస 1978 చిత్రం విడుదలయిన ఇన్ని నెలలకు దర్శకుడు కరుణ కుమార్‌ తదుపరి చిత్రం విషయంలో క్లారిటీ వచ్చింది. అల్లు అరవింద్‌ అడ్వాన్స్‌ ఇచ్చినా కూడా ఆయన నిర్మాణంలో కాకుండా జీవిత నిర్మాణంలో కరుణ కుమార్‌ సినిమా ఉండబోతుందని ఇండస్ట్రీ వర్గాల్లో  టాక్‌ వినిపిస్తుంది. రాజశేఖర్‌ హీరోగా జీవిత నిర్మాణంలో కరుణ కుమార్‌ మూవీ ప్లానింగ్స్‌ జరుగుతున్నాయి. అందుకు సంబంధించిన చర్చలు కూడా దాదాపుగా ముగింపు దశకు వచ్చాయట.

రాజశేఖర్‌ తో ఒక విభిన్నమైన సోషల్‌ డ్రామా సినిమాను కరుణ కుమార్‌ తెరకెక్కించేందుకు స్క్రిప్ట్‌ రెడీ చేశాడట. తన మొదటి సినిమా తరహాలోనే రాజశేఖర్‌ తో కూడా పీరియాడిక్‌ నేపథ్యంలో సినిమాను రూపొందించబోతున్నాడట. వచ్చే నెలలోనే ఈ సినిమా రెగ్యులర్‌ షూటింగ్‌ ప్రారంభం అయ్యే అవకాశం ఉందని తెలుస్తోంది. గత కొన్నాళ్లుగా రాజశేఖర్‌ చేస్తున్న సినిమాలు నిరాశ పర్చుతూనే ఉన్నాయి. మద్యలో గరుడవేగ కాస్త ఆయనకు పాజిటివ్‌ రెస్పాన్స్‌ ఇచ్చినా ఆ తర్వాత వచ్చిన సినిమా మళ్లీ నిరాశే మిగిల్చింది. అందుకే కరుణ సాగర్‌ తో విభిన్నమైన సినిమాకు రాజశేఖర్‌ రెడీ అయ్యాడట.