మహేష్‌ వల్ల చైతూ సినిమా వాయిదా.. క్యాన్సిల్‌ అవ్వలేదు

సూపర్‌ స్టార్‌ మహేష్ బాబు తో ప్రస్తుతం సర్కారు వారి పాట సినిమా చేస్తున్న దర్శకుడు పరశురామ్‌ ఇటీవల అల్లు అర్జున్ కు కథ చెప్పి ఓకే చెప్పించుకున్నాడు అంటూ వార్తలు వస్తున్నాయి. గీతా ఆర్ట్స్ బ్యానర్‌ లో అల్లు అర్జున్‌ హీరోగా పరశురామ్‌ దర్శకత్వంలో సినిమా తెరకెక్కబోతున్నట్లుగా వార్తలు వస్తున్న నేపథ్యంలో మరో ఆసక్తికర ప్రచారం ఒకటి మొదలు అయ్యింది. పరశురామ్‌ దర్శకత్వంలో అక్కినేని హీరో నాగచైతన్య హీరోగా ఒక సినిమా తెరకెక్కబోతున్నట్లుగా ఆ మద్య వార్తలు వచ్చాయి. సినిమా పట్టాలెక్కబోతుంది అనుకుంటూ ఉండగా ఇద్దరి మద్యలోకి మహేష్‌ బాబు వచ్చి చేరాడు. దాంతో చైతూ.. పరశురామ్‌ ల కాంబో మూవీ అటకెక్కిందని కొందరు.. క్యాన్సిల్‌ అయ్యిందని మరి కొందరు కామెంట్స్‌ చేశారు.

సర్కారు వారి పాట సినిమా తర్వాత అల్లు అర్జున్‌ తో పరశురామ్‌ సినిమా ఉంటుందని వార్తలు వస్తున్న నేపథ్యంలో ఇక చైతూ సినిమా పూర్తిగా క్యాన్సిల్‌ అయినట్లే అంటూ కొందరు అనుకుంటూ ఉన్నారు. ఈ సమయంలో పరశురామ్‌ కాంపౌండ్ నుండి ఇంట్రెస్టింగ్‌ అప్‌ డేట్ వచ్చింది. విశ్వసనీయంగా అందుతున్న సమాచారం ప్రకారం మహేష్‌ బాబుతో ప్రస్తుతం చేస్తున్న సర్కారు వారి పాట సినిమా తర్వాత పరశురామ్‌ చేయబోతున్న మూవీ నాగచైతన్యతో అంటూ క్లారిటీ ఇచ్చారు.

సర్కారు వారి పాట సినిమా తర్వాత పరశురామ్ క్రేజ్‌ అమాంతం పెరగడం ఖాయం. అలాంటి దర్శకుడితో నాగచైతన్య మూవీ కన్ఫర్మ్‌ గా ఉందంటూ వస్తున్న వార్తల నేపథ్యంలో అక్కినేని ఫ్యాన్స్ ఫుల్‌ హ్యాపీగా ఉన్నారు. మహేష్‌ బాబు నుండి ఆఫర్‌ రావడం వల్ల చైతూ సినిమాను వాయిదా వేశాడే తప్ప వదిలేయలేదు.. అందుకే పరశురామ్‌ తదుపరి సినిమా నాగచైతన్యతో అంటూ సమాచారం అందుతోంది. వచ్చే ఏడాదిలో చైతూ మరియు పరశురామ్‌ ల కాంబో మూవీ ప్రేక్షకుల ముందుకు వస్తుందేమో చూడాలి.