పవర్ స్టార్ 'ఏకే' రీమేక్ షూటింగ్ లేటెస్ట్ అప్డేట్..!

మలయాళ సూపర్ హిట్ అయిన 'అయ్యప్పనుమ్ కోషియమ్' చిత్రాన్ని తెలుగులో పవర్‌ స్టార్ పవన్ కళ్యాణ్ - దగ్గుబాటి రానా హీరోలుగా రీమేక్ చేస్తున్న విషయం తెలిసిందే. సాగర్.కె.చంద్ర దర్శకత్వం వహిస్తున్న ఈ చిత్రాన్ని సితార ఎంటర్‌టైన్‌మెంట్స్ బ్యానర్‌ పై సూర్యదేవర నాగవంశీ నిర్మిస్తున్నాడు. డైరెక్టర్ త్రివిక్రమ్ శ్రీనివాస్ ఈ చిత్రానికి స్క్రీన్‌ ప్లే మరియు డైలాగ్స్ అందిస్తున్నాడు. ఇటీవలే ప్రారంభమైన ఈ సినిమా రెండు షెడ్యూల్స్ షూటింగ్ పూర్తి చేసుకుంది.

తాజా సమాచారం ప్రకారం ఈ రీమేక్ తదుపరి షెడ్యూల్ తమిళనాడు రాష్ట్రంలో ప్రారంభం కానుందట. పవన్ వీలైనంత త్వరగా ఈ చిత్రాన్ని పూర్తి చేయాలని నిర్ణయించుకున్నట్లు తెలుస్తోంది. మెగా దగ్గుబాటి హీరోలు కలిసి నటిస్తున్న ఈ చిత్రంపై సినీ అభిమానుల్లో ఆసక్తి నెలకొంది. ఇప్పటికే షూటింగ్ లొకేషన్స్ నుంచి బయటకు వచ్చిన పవన్ - రానా ఫోటోలు అభిమానుల్లో అంచనాలను పెంచేశాయి. ఇందులో నిజాయితీ గల పోలీస్ ఆఫీసర్ గా పవన్ నటిస్తుండగా.. అతనిని ఢీకొట్టే పవర్ ఫుల్ పాత్రలో రానా కనిపించనున్నారు.

ఇంకా టైటిల్ ఖరారు కాని ఈ చిత్రానికి థమన్ సంగీతం సమకూరుస్తుండగా.. ప్రసాద్ మూరెళ్ళ సినిమాటోగ్రాఫర్ గా వ్యవహరిస్తున్నాడు. నవీన్ నూలి ఎడిటింగ్ బాధ్యతలు నిర్వర్తిస్తున్నారు. ఏ.ఎస్.ప్రకాష్ ఆర్ట్ డైరెక్టర్ గా వర్క్ చేస్తున్నారు.