సర్దార్ కోసం స్పీడ్ పెంచాడు..

పవర్ స్టార్ పవన్ కళ్యాణ్ లేటెస్ట్ మూవీ సర్దార్ గబ్బర్ సింగ్ మహా జోరుగా ఉన్నాడు. రీసెంట్ గా గుజరాత్ షెడ్యూల్ కంప్లీట్ చేసుకువచ్చింది సర్దార్ టీం. షూటింగ్ మొదలవడంలో ఆలస్యం జరిగినా.. సెట్స్ పై మాత్రం సర్దార్ చాలా స్పీడ్ చూపిస్తున్నాడు. పిక్చరైజేషన్ విషయంలో డైరెక్టర్ బాబీ చాలా క్లారిటీతో ఉండడంతో.. అన్ని పనులు చకచకా జరిగిపోతున్నాయని తెలుస్తోంది.

ఇప్పటికే సర్దార్ గబ్బర్ సింగ్ కు సంబంధించి 70శాతం షూటింగ్ కంప్లీట్ అయిపోయినట్లు యూనిట్ వర్గాలు చెబుతున్నాయి. రిలీజ్ కి ఇంకా 3 నెలలకు పైగా సమయం ఉన్నా.. ఇప్పటికే సెవెంటీ పర్సెంట్ షూటింగ్ అంటే మాటలు కాదు. ముఖ్యంగా హైద్రాబాద్ కు బయట జరిగే షెడ్యూల్స్ విషయంలో దర్శకుడు - నిర్మాతలు మంచి సమన్వయంతో పని చేస్తున్నారని తెలుస్తోంది. ముందుగానే రిహార్సల్స్ కూడా చేసుకుని స్టార్ట్ చేస్తుండడంతో.. పనులన్నీ చకచకా జరిగిపోతున్నాయట. పాటలను చివర్లో షూటింగ్ చేయాలి వంటి కమిట్ మెంట్స్ పెట్టుకోకుండా.. ఒకసారి వెళ్లిన ప్లేస్ కి మరోసారి వెళ్లకుండా జాగ్రత్త పడుతున్నారు. అందుకే.. గుజరాత్ లో ఇప్పటికే పాటలను కూడా చిత్రీకరించేశారు.

సర్దార్ కు సంబంధించిన మరుసటి షెడ్యూల్ 2016 జనవరి 4న హైద్రాబాద్ లో ప్రారంభం కానుంది. మార్చ్ మధ్యలో ఆడియో ఫంక్షన్ నిర్వహించి.. ఏప్రిల్ లో రిలీజ్ చేసేందుకు సన్నాహాలు చేసుకుంటున్నాడు నిర్మాత శరత్ మరార్. అయితే.. న్యూ ఇయర్ రోజున టీజర్ రిలీజ్ చేస్తారనే వార్తలు.. పవన్ ఫ్యాన్స్ లో హుషారు పెంచుతున్నాయి.