పిక్ టాక్: హ్యాట్రిక్ బ్లాక్ బస్టర్ ఆనందంలో దర్శక హీరోలు..!

మాస్ మహారాజా రవితేజ - దర్శకుడు గోపీచంద్ మలినేని కాంబినేషన్ లో వచ్చిన 'క్రాక్' మూవీ బ్లాక్ బస్టర్ హిట్ గా నిలిచింది. సంక్రాంతి బరిలో నిలిచిన 'క్రాక్' బాక్సాఫీస్ వద్ద మంచి వసూళ్లు రాబట్టి ఈ ఏడాది విన్నర్ అనిపించుకుంది. రవితేజ - గోపీచంద్ కలయికలో ఇంతకముందు 'డాన్ శీను' 'బలుపు' వంటి సూపర్ హిట్స్ అందుకుని ఇప్పుడు 'క్రాక్' సినిమాతో బ్లాక్ బస్టర్ కాంబో అనిపించుకుంది. దీంతో ఖుషీగా ఉన్న దర్శక హీరోలు సక్సెస్ ని ఎంజాయ్ చేస్తున్నారు. వీరి మధ్య ఫ్రెండ్ షిప్ మరింత బలోపేతం అయినందుకు తాజాగా రవితేజ - గోపీచంద్ ఇద్దరూ ఒకరినొకరు హగ్ చేసుకుని సంతోషాన్ని వ్యక్త పరచుకున్నారు.

'క్రాక్' వంటి క్రాకింగ్ బ్లాక్ బస్టర్ తర్వాత వీరి కాంబినేషన్ లో మరిన్ని సినిమాలు రావాలని అభిమానులు కోరుకుంటున్నారు. కాగా, 'క్రాక్' చిత్రాన్ని సరస్వతి ఫిలిం డివిజన్ బ్యానర్‌ పై ఠాగూర్ మధు నిర్మించారు. ఇందులో రవితేజకు జోడీగా శృతి హాసన్ హీరోయిన్ గా నటించింది. ఈ చిత్రంలో సముద్రఖని - వరలక్ష్మీ శరత్ కుమార్ కీలక పాత్రలు పోషించారు. రవితేజ నటన గోపీచంద్ కథను నడిపించిన విధానం ప్రేక్షకులను ఆకట్టుకున్నాయి. ఇక ఈ సినిమాకి థమన్ సమకూర్చిన బ్యాగ్రౌండ్ మ్యూజిక్.. సినిమాటోగ్రాఫర్ జీకే విష్ణు అందించిన విజువల్స్ ప్లస్ అయ్యాయి. అలానే ఫైట్ మాస్టర్స్ రామ్ లక్ష్మణ్ కంపోజ్ చేసిన యాక్షన్ కూడా సినిమా విజయానికి దోహదం చేశాయి.