'సైరా'లో పూనమ్ కౌర్?

పూనమ్ కౌర్ సినిమా కెరీర్ ముగిసిపోయే చాలా కాలమే అయింది. ఈ పాటికి అందరూ ఆమెను మరిచిపోయి ఉండాలి. కానీ ఆమె వేరే కారణాలతో వార్తల్లో నిలిచింది. మళ్లీ లైమ్ లైట్లోకి వచ్చింది. ఆమెకు ఆశ్చర్యకర రీతిలో కొన్ని అవకాశాలు కూడా వస్తున్నాయి. ఈటీవీతో కలిసి బాహుబలి నిర్మాతలు ప్రొడ్యూస్ చేసిన భారీ సీరియల్ ‘స్వర్ణ ఖడ్గం’లో కీలక పాత్ర చేసే అవకాశం పూనమ్ కు దక్కడం అందరికీ ఆశ్చర్యం కలిగించింది. ఇక తాజాగా ఆమె ‘శ్రీనివాస కళ్యాణం’ లాంటి క్రేజీ మూవీలోనూ కనిపించింది. పవన్ కళ్యాణ్ ను పరోక్షంగా టార్గెట్ చేస్తూ వస్తున్న పూనమ్ కు పవన్ వీరాభిమాని అయిన నితిన్ సినిమాలో అవకాశం దక్కడంపై రకరకాల కామెంట్లు పడ్డాయి. కట్ చేస్తే ఇప్పుడు పూనమ్ ఏకంగా మెగాస్టార్ చిరంజీవి సినిమా ‘సైరా నరసింహారెడ్డి’లో నటించే అవకాశమున్నట్లు వస్తున్న వార్తలు మరింత ఆశ్చర్యానికి గురి చేస్తున్నాయి.

వివిధ భాషల నుంచి భారీ తారాగణం నటిస్తున్న ‘సైరా’లో ఓ కీలక పాత్ర కోసం ముగ్గురు హీరోయిన్లను ఇటీవలే ఆడిషన్ చేశారట. ఆ ముగ్గురిలో పూనమ్ ఒకరు. మిగతా ఇద్దరు సీనియర్ హీరోయిన్ రంభ.. ‘ఆనందం’ భామ రేఖ. ఐతే రంభకు ఆడిషన్ జరిగాక ఆమె ప్రెగ్నెంట్ అని తేలడంతో ఇక సినిమాలో నటించే అవకాశం లేనట్లే. రేఖ విషయానికి వస్తే ఆమె పూర్తిగా షేపవుట్ అయిపోయింది. జనాలు ఆమెను మరిచిపోయారు కూడా. అంతో ఇంతో వార్తల్లో నిలుస్తున్నది పూనమే కాబట్టి ఆమెనే ఫైనలైజ్ చేస్తారని అంటున్నారు. కానీ పవన్ ను టార్గెట్ చేసిన పూనమ్ కు చిరు సినిమాలో అవకాశం దక్కితే రకరకాల అనుమానాలు కలుగుతాయి. పవన్ అభిమానులు ఆమెను తీవ్రంగా వ్యతిరేకిస్తున్నట్లు తెలుస్తోంది. కానీ చిత్ర బృందం మాత్రం పూనమ్ కే ఛాన్సిస్తుందని అంటున్నారు. మరి ఇందులో పూనమ్ పాత్ర ఎలా ఉంటుందో.. ఆమెను జనాలు ఎలా రిసీవ్ చేసుకుంటారో చూడాలి.