చరణ్ కెరియర్లోనే పవర్ఫుల్ పాత్ర .. 'సిద్ధ'

ఒక వైపున హీరోగా .. మరో వైపున నిర్మాతగా చరణ్ ఫుల్ బిజీగా ఉన్నాడు. చరణ్ హీరోగా చేసిన 'ఆర్ ఆర్ ఆర్' ప్రపంచవ్యాప్తంగా ప్రేక్షకుల ముందుకు రానుంది. ప్రస్తుతం అందుకు సంబంధించిన సన్నాహాలు చకచకా జరిగిపోతున్నాయి. ఇక ఇదే సమయంలో చరణ్ 'ఆచార్య' సినిమాలోను చేస్తున్నాడు. చిరంజీవి - కాజల్ నాయకా నాయికలుగా నటిస్తున్న ఈ సినిమాపై భారీ అంచనాలు ఉన్నాయి. కొరటాల శివ దర్శకత్వం వహిస్తున్న ఈ సినిమాకి చరణ్ ఒక నిర్మాతగా వ్యవహరించడమే కాకుండా, ఒక కీలకమైన పాత్రను పోషిస్తున్నాడు.

దేవాలయ భూముల ఆక్రమణ .. అవినీతి రాజకీయనాయకుల ఆగడాలు .. వాళ్లని ప్రశ్నించే ఓ నిజాయితీగల పౌరుడిగా చిరంజీవి చుట్టూ ఈ కథ నడుస్తుంది. ఈ సినిమాలో మరో పవర్ఫుల్ పాత్రను చరణ్ చేస్తున్నాడు. తెరపై చరణ్ కనిపించేది కొంతసేపే అయినా, ఆ పాత్ర సినిమా అంతటా తన ప్రభావం చూపుతూనే ఉంటుందట. చరణ్ పాత్ర పేరు 'సిద్ధ' .. ఈ పాత్రను కొరటాల చాలా కొత్తగా డిజైన్ చేశాడని చెబుతున్నారు. గుండెల నిండా .. కండల నిండా నీతి నిజాయితీలను నింపుకున్న యువకుడిగా ఆయన ఈ పాత్రలో కనిపించనున్నాడని అంటున్నారు.

సమాజానికి పట్టిన చీడను వదిలించాలనే పట్టుదలతో ముందుకుసాగేదిగా 'సిద్ధ' పాత్ర ఉంటుందనీ, అవినీతిని సమాధి చేసే ప్రయత్నంలో తన ప్రాణాలను సైతం పణంగా పెట్టే ఈ పాత్రలో చరణ్ నటన అద్భుతంగా ఉంటుందని అంటున్నారు. 'సిద్ధ' పాత్రలో చరణ్ లుక్ .. ఆయన డైలాగ్ డెలివరీ .. యాక్షన్ ఎపిసోడ్ .. కొత్తగా ఉంటాయని చెబుతున్నారు. చరణ్ ఇంతవరకూ చేసిన గుర్తుండిపోయే పాత్రల్లో 'సిద్ధ' పాత్ర ప్రధానంగా కనిపిస్తుందనే అభిప్రాయాలు వ్యక్తమవుతున్నాయి. తెరపై పూజా హెగ్డేతో కలిసి ఆయన చేసే సందడిని చూసితీరవలసిందేనని అంటున్నారు.