ప్రభాస్ సినిమాకు చిత్రమైన టైటిల్?

బాహుబలి: ది కంక్లూజన్’ కోసం ఐదేళ్ల సమయం వెచ్చిన యంగ్ రెబల్ స్టార్ ప్రభాస్.. ఆ తర్వాత కూడా ఏమంత స్పీడు చూపించట్లేదు. అతడి కొత్త సినిమా ‘సాహో’ కూడా భారీ ఖర్చు.. శ్రమతో కూడుకున్న సినిమా కావడంతో షూటింగ్ నెమ్మదిగా జరుగుతోంది. ఈ సినిమా ఒక్కదాని కోసం ఇంకో రెండు మూడేళ్లు ఖర్చు చేస్తే ప్రభాస్ కెరీర్ కు నష్టం జరుగుతుంది. అందుకే ‘జిల్’ ఫేమ్ రాధాకృష్ణ కుమార్ దర్శకత్వంలో మరో సినిమాను కూడా ఈ మధ్యే మొదలుపెట్టి ‘సాహో’తో సమాంతరంగా పూర్తి చేసే పనిలో పడ్డాడు ప్రభాస్. ఈ రెండు చిత్రాల షూటింగ్ యూరప్ లోనే జరుగుతుండటం విశేషం. ఇటీవలే ఇటలీలో ప్రభాస్-రాధాకృష్ణ సినిమా షూటింగ్ మొదలుపెట్టారు. చిత్రీకరణ జోరుగానే సాగుతోందట. ఇంతలోనే ఈ చిత్ర టైటిల్ గురించి ఆసక్తికర వార్త ప్రచారంలోకి వచ్చింది.

ప్రభాస్-రాధాకృష్ణ సినిమాకు ‘అమూర్’ అనే టైటిల్ ఖరారైందట. ఈ అమూర్ ఏంటి అని ఆశ్చర్యం కలుగుతోంది కదా? ఇది ఫ్రెంచ్ పదమట. దానికి ‘ప్రేమ’ అని అర్థమట. ఈ సినిమా యూరప్ నేపథ్యంలోనే సాగుతుంది కాబట్గి.. టైటిల్ విషయంలో ఇబ్బందేమీ లేదని.. సినిమాలో ఒకచోట అర్థం చెప్పించేస్తే సరిపోతుందని.. ప్రేక్షకులకు ఇది డిఫరెంట్ ఫీలింగ్ ఇస్తుందని భావించి.. చిత్ర బృందం ఈ టైటిలే ఖరారు చేసిందట. త్వరలోనే అధికారిక ప్రకటన వస్తుందంటున్నారు. ‘సాహో’ను నిర్మిస్తున్న ప్రభాస్ మిత్రులు వంశీ-ప్రమోద్-విక్కీలే ఈ చిత్రాన్ని కూడా ప్రొడ్యూస్ చేస్తున్నారు. తెలుగు-తమిళం-హిందీ భాషల్లో భారీ బడ్జెట్లో తెరకెక్కుతున్న ఈ చిత్రం పునర్జన్మల నేపథ్యంలో సాగుతుందంటున్నారు. పూజా హెగ్డే ప్రభాస్ కు జోడీగా నటిస్తోంది. ‘సాహో’తో పాటు ఈ చిత్రమూ వచ్చే ఏడాదే రిలీజయ్యే అవకాశాలున్నాయి.