'అమెజాన్'తో బిగ్ డీల్ కుదుర్చుకున్న గ్లోబల్ బ్యూటీ!

కరోనా మహమ్మారి కారణంగా సినీ సెలెబ్రిటీలంతా ఎన్నడూ లేని విధంగా ఇళ్లలో కాలక్షేపం చేస్తున్నారు. సరదాగా కుటుంబంతో గడపడం, పిల్లలతో ఆడుకోవడం, గార్డెనింగ్.. కొందరేమో కొత్త సినిమాల కోసం స్క్రిప్టులు వినడం ఇలా ఏదోకటి చేస్తూ బిజీ అయ్యారు. గ్లోబల్ హీరోయిన్ ప్రియాంక చోప్రా అయితే యంగ్ సింగర్ నిక్ జోనస్ తో హోమ్ క్వారంటైన్ లో ఎంజాయ్ చేస్తుంది. కొత్తగా పెళ్లయింది కదా భర్తతో కలిసి లాస్ ఏంజెల్స్ లో నివసిస్తూ వివాహ బంధంలోని మాధుర్యాన్ని ఆస్వాదిస్తుంది. ఇక ఎలాగో గృహ నిర్బంధంలో ఉంది కదా.. సరదాగా వంటలు చేస్తూ.. ఫిట్నెస్ ప్రయోగాలు చేస్తూ కాలం గడిపేస్తుందేమో.. అనుకుంటే పొరపాటే. హాలీవుడ్ లో అవకాశం వచ్చాక ప్రియాంక అసలు మళ్లీ ఇండియన్ సినిమాలలో కనిపించలేదు. పూర్తిగా ఇంగ్లీష్ సీరియల్స్, వెబ్ సిరీస్లు, సినిమాలపై దృష్టి పెట్టింది.

నిక్ జోనస్ తో పెళ్లయ్యాక ఇండియన్ బ్యూటీ ప్రియాంక చోప్రా పూర్తిగా ఫారెన్ అమ్మాయిలా మారిపోయింది. తన కట్టు బొట్టు వాలకం అన్నీ పాశ్చాత్య సంస్కృతినే ఫాలో అవుతుంది. ప్రేమించి పెళ్లి చేసుకుంది కదా.. ఆ మాత్రం పోకడలు పోతుందిలే అని అభిమానులు సర్దుకుంటున్నారు. అయితే అమ్మడు తాజాగా అభిమానులకు ఓ భారీ న్యూస్ చెప్పింది. ప్రియాంక అమెజాన్‌‌తో మల్టీ మిలియన్‌ డాలర్లు విలువ చేసే భారీ డీల్ కుదుర్చుకుందట. `ఫస్ట్‌ లుక్‌` టెలివిజన్‌ డీల్ కోసం ప్రియాంక రెండేళ్ల పాటు అమెజాన్‌తో కలిసి పనిచేయనుంది. ఈ సందర్భంగా ప్రియాంక ట్విట్టర్ లో పోస్ట్ చేస్తూ.. `ఓ నటిగా, నిర్మాతగా.. భాష, ప్రాంతీయ బేధాలు లేకుండా ప్రపంచంలోని ప్రతిభ అంతా ఒక చోట చేరి గొప్ప కంటెంట్‌ను సృష్టించాలని నేను ఎప్పుడూ కోరుకుంటాను. నా నిర్మాణ సంస్థ ముఖ్య ఉద్దేశం కూడా అదే. ఇప్పుడు అమెజాన్‌తో కలిసి పనిచేస్తుండడం దానికి నాందిగా మారుతుందని అనుకుంటున్నాను" అంటూ పోస్ట్ చేసింది. దీంతో అమ్మడి అభిమానులు ఆనందం వ్యక్తం చేస్తున్నారు.