రాశి అప్పుడు టిక్ టాక్ స్టార్‌.. ఇప్పుడు టీవీ సీరియల్ స్టార్‌

మారుతి దర్శకత్వంలో వచ్చిన ప్రతి రోజు పండుగే సినిమాలో హీరోయిన్ గా నటించిన రాశి ఖన్నా టిక్ టాక్ వీడియోలు చేస్తూ ఉండే టిక్ టాక్ స్టార్‌ పాత్రలో కనిపించింది. టిక్ టాక్ వీడియోలు చేస్తూ ఎంటర్ టైన్‌ చేసే పాత్రను పోషించి మెప్పించిన రాశి ఖన్నా ప్రస్తుతం మారుతి దర్శకత్వంలో రూపొందుతున్న పక్కా కమర్షియల్‌ సినిమా లో కూడా నటిస్తుంది. ఆ సినిమాలో టిక్‌ టాక్ స్టార్‌ గా రాశి ఖన్నాను చూపించిన దర్శకుడు మారుతి పక్కా కమర్షియల్‌ సినిమాలో సీరియల్‌ ఆర్టిస్టుగా కనిపించబోతుందట. సీరియల్‌ ఆర్టిస్టులు ప్రతి విషయాన్ని సాగతీసినట్లుగా మాట్లాడటం ప్రతి సందర్బంలో కూడా చెప్పిందే చెప్పడం చేస్తూ ఉంటారు. అలా సినిమాలో రాశి ఖన్నా పాత్ర ఉంటుందని సమాచారం అందుతోంది.

గోపీచంద్ తో గతంలోనే కలిసి నటించిన రాశిఖన్నా ఈ సినిమాతో మరోసారి ఆయనతో జత కట్టింది. మారుతి దర్శకత్వంలో సినిమా అనగానే ఫ్యామిలీ ఆడియన్స్  అంచనాలు భారీగా పెంచేసుకుంటున్నారు. అందుకు తగ్గట్లుగానే ఈ సినిమా తప్పకుండా ఉంటుందని ఇండస్ట్రీ వర్గాల వారు మరియు యూనిట్‌ సభ్యులు అభిప్రాయం వ్యక్తం చేస్తున్నారు. ఈ సినిమాలో హీరో పాత్ర మరీ కమర్షియల్‌ గా ఉంటుందట. ప్రతి విషయాన్ని కూడా కమర్షియల్ గా చూడటం వల్ల పక్క వారిని కూడా ఇబ్బంది పెడుతూ చెడ్డ వాడిగా పేరు తెచ్చుకుంటాడు.

మహానుభావుడు సినిమాలో ఓవర్ క్లీనింగ్ గా ఉండాలనే స్వభావం కారణంగా ఇబ్బందులు పడ్డట్లుగా ఈ సినిమాలో హీరో మంచి వాడే అయినా కూడా కమర్షియల్ అవ్వడం వల్ల ఇతరులను ఇబ్బంది పెడుతూ తాను కూడా సమస్యల్లో చిక్కుకుంటాడు. జీఏ2 మరియు యూవీ క్రియేషన్స్‌ వారు నిర్మిస్తున్న ఈ సినిమా ను అక్టోబర్ లో విడుదల చేస్తామని మేకర్స్ ఇప్పటికే ప్రకటించారు.