ఆ హీరోయిన్ మళ్లీ సౌత్ పై

బాలయ్య పేరెత్తలేదు కానీ.. ఆ మధ్య ఆయన్ని ఉద్దేశించి పరోక్షంగా సంచలన వ్యాఖ్యలు చేసి వార్తల్లో నిలిచింది రాధికా ఆప్టే. సౌత్ సినిమాల్లో మగాళ్ల ఆధిపత్యం ఎక్కువని.. అందరూ హీరోల చుట్టూనే తిరుగుతారని.. హీరోయిన్లను అస్సలు పట్టించుకోరని ఆమె అప్పట్లో వ్యాఖ్యానించింది. తాజాగా రాధిక మరోసారి ఇదే తరహా వ్యాఖ్యలతో మళ్లీ వార్తల్లోకి వచ్చింది. ఓ ఇంటర్వ్యూ సందర్భంగా గతంలో సౌత్ ఇండస్ట్రీ మీద చేసిన వ్యాఖ్యలపై ప్రస్తావించగా.. ఈసారి తెలుగు ఇండస్ట్రీనే టార్గెట్ చేస్తూ ఆమె వ్యాఖ్యలు చేయడం విశేషం.

‘‘సౌత్ లో అన్ని ఇండస్ట్రీలను జనరలైజ్ చేసి మాట్లాడను. నేనక్కడ చేసింది మూడు సినిమాలే. అందులో ‘కబాలి’కి పని చేయడం నాకు మంచి అనుభవాన్నిచ్చింది. నేను చేసిన మిగతా రెండు సినిమాలు నాకు చుక్కలు చూపించాయి. ఆ సినిమాల షూటింగ్ సందర్భంగా హీరో తొమ్మిది గంటలకు వచ్చేవాడు. కానీ నేను మాత్రం రెండు గంటల ముందే రావాల్సి వచ్చేది. అలాంటి తేడాలో బాలీవుడ్లో కనిపించవు’’ అని వ్యాఖ్యానించింది రాధిక.

‘కబాలి’ కాకుండా సౌత్ ఇండియాలో రాధిక నటించిన రెండు సినిమాలంటే బాలయ్యతో చేసిన ‘లెజెండ్’.. ‘లయన్’ మాత్రమే. కాబట్టి రాధిక ఎవరిని ఉద్దేశించి ఆ వ్యాఖ్యలు చేసిందో సులువుగానే అర్థం చేసుకోవచ్చు. ఇంతకుముందు రాధిక ఈ తరహా వ్యాఖ్యలు చేసినపుడు ‘లెజెండ్’ ప్రొడ్యూసర్ సాయి కొర్రపాటి స్పందించాడు. రాధికను ఏమీ అనకుండా.. సుతిమెత్తగానే మాట్లాడాడు. అభిమానులు కూడా లైట్ తీసుకున్నారు. కానీ రాధిక ఇంకోసారి బాలయ్యను ఉద్దేశించి వ్యాఖ్యలు చేసిన నేపథ్యంలో నందమూరి ఫ్యాన్స్ ఎలా స్పందిస్తారో చూడాలి.

Like Us on Facebook : https://www.facebook.com/Tupakidotcom/