శ్రీ‌రెడ్డికి లారెన్స్ బంప‌ర్ ఆఫ‌ర్!

టాలీవుడ్ లో క్యాస్టింగ్ కౌచ్ పై పోరాటం అంటూ కొద్ది రోజుల క్రితం న‌టి శ్రీ‌రెడ్డి పేరు ఇటు మీడియాలో....అటు సోష‌ల్ మీడియాలో మార్మోగిపోయిన‌ సంగ‌తి తెలిసిందే. కొన్ని ప‌రిణామాల వ‌ల్ల శ్రీ‌రెడ్డి ఇటు మీడియాకు దూరం కాగా....సోష‌ల్ మీడియాలో అపుడపుడు ద‌ర్శ‌న‌మిస్తోంది. తాజాగా, త‌న ఫోక‌స్ ను శ్రీ‌రెడ్డి....టాలీవుడ్ నుంచి కోలీవుడ్ కు మార్చిన సంగ‌తి తెలిసిందే. మురుగ‌దాస్ - తమిళ హీరో శ్రీ‌కాంత్ - లారెన్స్ రాఘ‌వ‌ల‌తో పాటు ప‌లువురు కోలీవుడ్ ప్ర‌ముఖుల‌పై శ్రీ‌రెడ్డి షాకింగ్ కామెంట్స్ చేస్తోన్న విష‌యం తెలిసిందే. త‌నకు అవ‌కాశాలిస్తానంటూ ...శ్రీ‌కాంత్ త‌న‌ను వాడుకున్నాడ‌ని శ్రీ‌రెడ్డి ఆరోపించింది. లారెన్స్ కూడా త‌న‌కు సినిమాల్లో చాన్స్ ఇస్తాన‌ని మోసం చేశార‌ని విమ‌ర్శించింది. తాజాగా, నటి శ్రీ రెడ్డి చేస్తున్న ఆరోపణలపై  లారెన్స్‌ స్పందించారు. శ్రీ‌రెడ్డి త‌న‌పై చేసిన ఆరోప‌ణ‌ల‌ను ఖండిస్తూ లారెన్స్ ట్వీట్ చేశారు. రెబెల్ సినిమా షూటింగ్ సమయంలో శ్రీ రెడ్డి త‌న‌ను క‌లిసింద‌ని - ఇప్ప‌టివ‌ర‌కు ఆమె త‌న‌పై ఆరోపణలు ఎందుకు చేయ‌లేద‌ని లారెన్స్ ప్ర‌శ్నించారు. త‌న‌ను తాను ప్రూవ్ చేసుకుంటే...ఇప్ప‌టికైనా శ్రీ‌రెడ్డికి సినిమాల్లో అవ‌కాశం ఇచ్చేందుకు తాను రెడీ అని చెప్పారు.

శ్రీ రెడ్డి పరిస్థితి చూస్తే జాలేస్తోంద‌ని - తాను ఓ  ప్రెస్‌ మీట్ ఏర్పాటు చేస్తాన‌ని - మీడియా ముందు శ్రీ‌రెడ్డి బేసిక్స్ స్థాయిలో న‌టన‌ - డ్యాన్స్ లో  టాలెంట్ ఉందని నిరూపిస్తే త‌న‌ నెక్స్ట్‌ మూవీలో ఛాన్స్‌ ఇస్తాన‌ని అన్నారు. మీడియా ముందు నటించడానికి ఇబ్బంది అనిపిస్తే...త‌న లాయర్  లేదా సన్నిహితులతో క‌లిసి త‌న మేనేజ‌ర్ ద‌గ్గ‌ర నటించి ప్రూవ్ చేసుకోవాల‌ని చాలెంజ్ చేశారు. తాను, మహిళలను గౌరవిస్తాన‌ని - అందుకే త‌న పై వ‌చ్చిన‌ మచ్చను తొలగించుకునేందుకే ఈ వివరణ ఇస్తున్నానని చెప్పారు. తల్లి కోసం గుడి కట్టిన తాను - మ‌హిళల పట్ల గౌరవంతో మెలిగాన‌ని చెప్పారు. శ్రీ రెడ్డి జీవితం బాగుండాలని దేవుడిని ప్రార్థిస్తున్నానని లారెన్స్ ట్వీట్ చేశారు. ఈ వివాదానికి ముగింపు పలకాలని తాను అనుకొంటున్నానని లారెన్స్ ట్వీట్ చేశారు. మ‌రి, లారెన్స్ఆఫ‌ర్ ను శ్రీ‌రెడ్డి స్వీక‌రిస్తుందో లేదో చూడాలి.