శర్వాను కాపీ కొడుతున్న ఆ కుర్రాడు

ఏదైనా పెద్ద పండగొచ్చి.. ఆ పండక్కి భారీ సినిమాలు రేసులోకి వస్తే.. శర్వానంద్ కూడా ఠంచనుగా దిగిపోతున్నాడు. గత రెండు సంక్రాంతి పండగలకు.. ఇటీవలే దసరాకు ఇలాగే తన సినిమాల్ని పెద్ద సినిమాలకు పోటీగా నిలబెట్టాడు శర్వా. ఈ మూడు సందర్భాల్లోనూ శర్వాకు చాలా మంచి ఫలితాలొచ్చాయి. మంచి కంటెంట్ ఉండాలే కానీ.. పండగలకి వచ్చే పెద్ద సినిమాల గురించి చిన్న సినిమాలు భయపడాల్సిన పని లేదని శర్వానంద్ సినిమాలతో రుజువైంది. ఇప్పుడు శర్వాను స్ఫూర్తిగా తీసుకుని మరో యువ కథానాయకుడు పండగలో పెద్ద హీరోలకు ఎదురెళ్లడానికి రెడీ అవుతున్నాడు. ఆ హీరో మరెవరో కాదు.. రాజ్ తరుణ్.

రాజ్ తరుణ్ హీరోగా తెరకెక్కుతున్న కొత్త సినిమా ‘రాజు గాడు’ను వచ్చే ఏడాది సంక్రాంతికి విడుదల చేయబోతున్నట్లు ప్రకటించి అందరినీ ఆశ్చర్యానికి గురి చేశారు. సంక్రాంతికి పవన్ కళ్యాణ్-త్రివిక్రమ్.. నందమూరి బాలకృష్ణ-కె.ఎస్.రవికుమార్‌ ల సినిమాలు షెడ్యూల్ అయ్యాయని తెలిసి కూడా ‘రాజు గాడు’ను అదే పండక్కి రిలీజ్ చేయబోతున్నట్లు ప్రకటించాడు నిర్మాత అనిల్ సుంకర. ఈడోరకం ఆడోరకం.. కిట్టు ఉన్నాడు జాగ్రత్త.. అంధగాడు తర్వాత అనిల్-రాజ్ తరుణ్ కాంబినేషన్లో రాబోయే నాలుగో సినిమా ఇది కావడం విశేషం. ఈ చిత్రంలో సంజనా రెడ్డి అనే కొత్త దర్శకురాలు టాలీవుడ్ కు పరిచయం కాబోతోంది. రాజ్ తరుణ్ సరసన ఈ చిత్రంలో బాలీవుడ్ భామ అమైరా దస్తుర్ కథానాయికగా నటించింది. ఐతే శర్వాకు కలిసొచ్చినట్లుగా అందరికీ కలిసొస్తుందన్న గ్యారెంటీ ఏమీ లేదు. అసలు సినిమాలో విషయం లేకపోతే మొదటికే మోసం వచ్చే ప్రమాదం కూడా లేకపోలేదు. కాబట్టి సంక్రాంతి రేసులోకి అన్నీ చూసుకుని దిగితే బెటర్.