రాజమౌళి ట్వీట్లు ఈసారి వృథా కాదు

రాజమౌళి మంచి దర్శకుడే కాదు.. మంచి ప్రేక్షకుడు.. సమీక్షకుడు కూడా. తన మిత్రులకు సంబంధించిన సినిమాలతో పాటు.. ఏదైనా సినిమా వైవిధ్యంగా ఉందని తెలిస్తే వెంటనే థియేటరుకెళ్లి సామాన్య ప్రేక్షకుల మధ్య కూర్చుని చూస్తాడు. సినిమా గురించి నాలుగు మంచి మాటలు చెబుతాడు. ఆయన పాజిటివ్ గా మాట్లాడిన చాలా సినిమాలు బాగా ఆడాయి. ఆయన ట్వీట్లు ఆయా సినిమాల ప్రమోషన్లకు బాగా ఉపయోగపడ్డాయి. ఐతే గత నెల ‘మనమంతా’ సినిమా గురించి రాజమౌళి చేసిన ట్వీట్లు మాత్రం ప్రేక్షకుల్లో కదలిక తేలేకపోయాయి. ఆ సినిమా గురించి ఎంతో గొప్పగా మాట్లాడిన రాజమౌళి.. తన మిత్రుడు బంధువు అయిన సాయి కొర్రపాటి తో కలిసి ప్రమోషన్ కూడా చేశాడు. కానీ ఫలితం లేకపోయింది.

ఐతే లేటెస్టుగా జక్కన్న మరో చిన్న సినిమా గురించి పాజిటివ్ ట్వీట్లు చేశాడు. ‘మనమంతా’ నిర్మాత సాయి కొర్రపాటే నిర్మించిన ‘జ్యో అచ్యుతానంద’పై ప్రశంసలు కురిపించాడు. ఈసారి మాత్రం జక్కన్న ప్రమోషన్ వృథా కాలేదు. సినిమాకు మంచి వసూళ్లే వస్తున్నాయి. ఓపెనింగ్స్ బాగున్నాయి.  మల్టీప్లెక్సుల్లో వీకెండ్ అంతా హౌస్ ఫుల్స్ గ్యారెంటీ. బి..సి సెంటర్లలో కొంచెం డల్లుగా ఉన్నాయి కలెక్షన్లు. మరోవైపు ఈ సినిమాను సుకుమార్.. త్రివిక్రమ్ లాంటి అగ్ర దర్శకులు సైతం రిలీజ్ కు ముందే పాజిటివ్ ప్రమోట్ చేయడం కలిసొచ్చింది. ఇంకా ఇండస్ట్రీలోకి చెందిన అనేకమంది సెలబ్రెటీలు ‘జ్యో అచ్యుతానంద’ గురించి పాజిటివ్ గా మాట్లాడుతున్నారు. ప్రేక్షకుల్లో మౌత్ టాక్ కూడా బాగుంది. నిర్మాత కూడా పబ్లిసిటీకి బాగానే ఖర్చు చేస్తున్నాడు. దీంతో సినిమా పెద్ద స్థాయికి చేరే అవకాశాలు కనిపిస్తున్నాయి.