ఒక్క దెబ్బకు అన్ని సినిమాలూ మటాష్

సరైన సినిమాలు రాక నెలా నెలన్నర కిందట రిలీజైన ‘అఆ’.. ‘జెంటిల్ మన్’ సినిమాలు కూడా నిన్నా మొన్నటి వరకు బాగా ఆడుతున్నాయి. కలెక్షన్లు రాబడుతున్నాయి. మరోవైపు బిచ్చగాడు స్టడీగా సాగిపోతోంది. ఇక గత వారం వచ్చిన సెల్ఫీ రాజా.. నాయకి సినిమాలకు నెగెటివ్ టాకే వచ్చింది. అయినప్పటికీ ఇందులో అల్లరి నరేష్ సినిమా వసూళ్లు బాగానే రాబడుతోంది. ఐతే ఈ శుక్రవారం నుంచి ఈ సినిమాలన్నింటికీ ఒకేసారి తెరపడబోతోంది. ‘కబాలి’ మేనియా తమిళ ప్రేక్షకుల్నే కాదు.. తెలుగు ఆడియన్స్ ను కూడా కూడా ఊపేస్తోంది. ప్రేక్షకులెవ్వరికీ కూడా వేరే సినిమాలు కనిపించే పరిస్థితి లేదు.

ఆన్ లైన్లో బుకింగ్స్ ఓపెన్ చేస్తే కొన్ని గంటల్లోనే ఫస్ట్ వీకెండ్ మొత్తానికి టికెట్లు చాలా వరకు అమ్ముడైపోయాయి. వీకెండ్లో టికెట్లు దొరకని వాళ్లు సోమవారం తర్వాత బుకింగ్స్ చేసుకుంటున్నారు. మొత్తానికి వచ్చే వారం రోజులు బాక్సాఫీస్ దగ్గర ‘కబాలి’ సందడే కనిపించబోతోంది. ప్రస్తుతం థియేటర్లలో ఉన్న సినిమాలన్నీ ఒకే దెబ్బకు రేసు నుంచి బయటికి వెళ్లిపోనున్నాయి. ఒక్క ‘బిచ్చగాడు’ మాత్రమే కాస్త నిలబడితే నిలబడొచ్చు. తొలి రోజు చాలా వరకు వేరే సినిమాల్ని పక్కనబెట్టేసి ‘కబాలి’ని ఆడించడానికి సన్నాహాలు చేసుకుంటున్నారు. సినిమాకు పాజిటివ్ టాక్ వస్తే.. తర్వాతి రెండు రోజుల్లోనూ ఇదే పరిస్థితి ఉండొచ్చు. కొన్ని మల్టీప్లెక్సుల్లో అయితే.. ముందు ‘కబాలి’కి కొన్ని షోలే ఇచ్చారు. కానీ టికెట్లు ఇలా పెట్టడం.. అలా అమ్ముడైపోవడం చూసి.. షోలు పెంచుకుంటూ పోతున్నారు. సింగిల్ స్క్రీన్లు సైతం ‘కబాలి’ ద్వారా సాధ్యమైనంతగా సంపాదించుకోవాలని చూస్తున్నాయి.