అవును.. మా తమ్ముడు హీరో అవుతున్నాడు

హీరోల తమ్ముళ్లు హీరోలవడం కామనే కానీ.. హీరోయిన్ల తమ్ముళ్లు హీరోలవడం అరుదు. రకుల్ ప్రీత్ సింగ్ తమ్ముడు అమన్ ప్రీత్ సింగ్ ఈ జాబితాలోనే చేరబోతున్నాడు. ఇప్పటికే హైదరాబాద్‌ కు చేరుకుని అక్క సాయంతో అతను సినిమా ప్రయత్నాలు మొదలుపెట్టినట్లు ఈ మధ్య వార్తలొచ్చాయి. ఈ విషయాన్ని స్వయంగా ఇప్పుడు రకులే కన్ఫమ్ చేసింది. తెలుగుతో తనకు బాగా అనుబంధం పెరిగిపోయిందని.. ఈ నేపథ్యంలోనే తన తమ్ముడు కూడా తెలుగులో హీరో కాబోతున్నాడని రకుల్ వెల్లడించింది.

‘‘నేనిప్పుడు పూర్తిగా తెలుగమ్మాయిని అయిపోయా. ‘నాన్నకు ప్రేమతో’ సినిమాకు డబ్బింగ్ కూడా చెప్పుకున్నా. ఇక ముందూ అలా చేయడానికి ప్రయత్నిస్తా. నేనిప్పుడు తెలుగులో మాట్లాడ్డమే కాదు.. ఆలోచించడం కూడా తెలుగులోనే చేస్తున్నా. సెట్లో ఎవరినైనా తిట్టాలన్నా తెలుగులోనే తిడుతున్నా. మా తమ్ముడు అమన్ కూడా తెలుగు నేర్చుకొంటున్నాడు. వాడికి నటనంటే ఇష్టం. తెలుగులో సినిమా చేయాలని ప్రయత్నిస్తున్నాడు. త్వరలోనే సినిమా మొదలవుతుంది’’ అని రకుల్ తెలిపింది.

ఇక తన కెరీర్ గురించి రకుల్ చెబుతూ.. ‘‘ఈ ఏడాది అద్భుతంగా సాగింది. మూడు పెద్ద హిట్లు నా ఖాతాలో పడ్డాయి. అందుకే సంబరాలకు రెడీ అవుతున్నా. ఐతే రాత్రికి రాత్రే నా జీవితం మారిపోలేదు. కథానాయికగా ఒకొక్క మెట్టు ఎక్కుతూ వచ్చా. ఇప్పుడు అగ్ర కథానాయకులందరితోనూ నటిస్తుండడం ఆనందంగా ఉంది. పవన్‌కల్యాణ్‌తో కలిసి నటించడం కోసం ఎదురుచూస్తున్నా. రాజమౌళిగారి దర్శకత్వంలో పని చేయడం నా కల. ‘'ఆషికి’.. ‘ఓకే బంగారం’ లాంటి సినిమాల్లో నటించాలని ఉంది. ప్రస్తుతం మహేష్‌ బాబు.. నాగచైతన్య.. సాయిధరమ్‌ తేజ్‌.. బెల్లంకొండ సాయిశ్రీనివాస్‌.. కార్తిలతో సినిమాలు చేస్తున్నా’’ అని తెలిపింది.

Like Us on Facebook : https://www.facebook.com/Tupakidotcom/