బాలకృష్ణ సరసన సందడి చేయనున్న రకుల్?

టాలీవుడ్ లోకి తారాజువ్వులా దూసుకొచ్చిన కథానాయికలలో రకుల్ ఒకరు. చిన్న సినిమాతో మొదలైన ఆమె కెరియర్ ఒక్కసారిగా ఊపందుకుంటుందని ఎవరూ అనుకోలేదు. అంత వేగంగా రకుల్ స్టార్ హీరోయిన్ ప్లేస్ ను సొంతం చేసుకుంది. తెలుగులోని యంగ్ స్టార్ హీరోలతో వరుస సినిమాలను చుట్టబెట్టేసింది. ఒక వైపున నాగచైతన్య .. బెల్లంకొండ శ్రీనివాస్ వంటి హీరోలతో పాటు, నాగార్జున .. రవితేజ వంటి సీనియర్ స్టార్ హీరోల సరసన కూడా అలరించింది. ఇలా తనకి ఎటు నుంచి అవకాశం వస్తే అటు సినిమాలను చేసుకుంటూ వెళ్లింది.

తమిళంలో స్టార్ హీరోల ప్రాజెక్టులను అందిపుచ్చుకోవడానికి ప్రయత్నిస్తూనే, బాలీవుడ్ లో పట్టు సాధించడానికి తనవంతు కృషి చేస్తూ వచ్చింది. ఈ నేపథ్యంలో తెలుగులో అవకాశాలు తగ్గినా, హిందీలో ఆమె పరిస్థితి కొంత ఆశాజనకంగానే ఉంది. హిందీలో ఆమె సీనియర్ స్టార్ హీరోల జోడీ కడుతుండటంతో, తెలుగులో కూడా ఆ దిశగా ఆమెను ఒప్పించడానికి ప్రయత్నాలు జరుగుతున్నట్టుగా తెలుస్తోంది. బాలకృష్ణ సరసన నాయిక పాత్ర కోసం ఆమెను సంప్రదిస్తున్నట్టుగా ఒక వార్త షికారు చేస్తోంది.

ప్రస్తుతం బాలకృష్ణ 'అఖండ'ను పూర్తిచేసే పనిలో ఉన్నారు. ఆ తరువాత సినిమాను గోపీచంద్ మలినేనితో చేయనున్నారు. ఇక గతంలో తనతో 'డిక్టేటర్' చేసిన శ్రీవాస్ కి కూడా బాలకృష్ణ ఛాన్స్ ఇచ్చారట. ఈ సినిమాను సి.కల్యాణ్ నిర్మించనున్నాడని అంటున్నారు. ఈ సినిమా కోసమే రకుల్ ను అడుగుతున్నట్టుగా చెప్పుకుంటున్నారు. ఇంతకుముందు శ్రీవాస్ చేసిన 'లౌక్యం'తో రకుల్ హిట్ అందుకుంది. ఆ పరిచయం కూడా ఒక కారణమని అంటున్నారు. శ్రీవాస్ సినిమాల్లో ఎక్కువగా బ్రహ్మానందం .. పోసాని కనిపిస్తూ వచ్చారు. వారికి కూడా ముఖ్యమైన పాత్రలు పడే అవకాశాలు పుష్కలంగా ఉన్నాయనే టాక్ వినిపిస్తోంది.