ఫొటో స్టోరీ : రామ్‌ చరణ్‌ లో మరో కోణం

మెగా పవర్‌ స్టార్‌ రామ్‌ చరణ్‌ ప్రస్తుతం బోయపాటి శ్రీను దర్శకత్వంలో ఒక చిత్రాన్ని చేస్తున్న విషయం తెల్సిందే. భారీ అంచనాల నడుమ రూపొందుతున్న ఈ చిత్రం షూటింగ్‌ ప్రస్తుతం అజార్‌ బైజాన్‌ లో జరుపుకుంటుంది. గత కొన్ని రోజులుగా అక్కడ నిరాటంకంగా షూటింగ్‌ జరుపుతున్నారు. షూటింగ్‌ కు సంబంధించిన ప్రతి విషయాన్ని ఉపాసన సోషల్‌ మీడియా ద్వారా షేర్‌ చేస్తూ వస్తుంది. తాజాగా ఒక ఫన్నీ పిక్‌ ను ఉపాసన సోషల్‌ మీడియాలో పోస్ట్‌ చేసింది.

ఆరోగ్యకరమైన భోజనాన్ని బాయ్స్‌ సిద్దం చేస్తున్నారంటూ ఉపాసన ఈ ఫొటోకు కామెంట్‌ పెట్టింది. షూటింగ్‌ మొత్తం చాలా సరదాగా సాగుతుంది అనేందుకు ఇది నిదర్శణంగా చెప్పుకోవచ్చు. రామ్‌ చరణ్‌ కు వంట చేయడం అంటే చాలా ఇష్టం. గతంలో ఈ విషయాన్ని స్వయంగా చరణ్‌ చెప్పాడు. షూటింగ్‌ బ్రేక్‌ లో చరణ్‌ సరదాగా వంట చేస్తున్న ఫొటోను ఉపాసన షేర్‌ చేయడంతో మెగా ఫ్యాన్స్‌ ఈ ఫొటోను తెగ షేర్‌ చేస్తున్నారు.

‘రంగస్థలం’ వంటి భారీ బ్లాక్‌ బస్టర్‌ చిత్రం తర్వాత చరణ్‌ చేస్తున్న సినిమా అవ్వడంతో అంచనాలు ఆకాశాన్ని తాకేలా ఉన్నాయి. బోయపాటి అందుకు తగ్గట్లుగా తనదైన మార్క్‌ యాక్షన్‌ ఎంటర్‌ టైనర్‌ గా ఈ చిత్రాన్ని తెరకెక్కిస్తున్నట్లుగా సమాచారం అందుతుంది. వచ్చే సంక్రాంతికి ఈ చిత్రం ప్రేక్షకుల ముందుకు రాబోతుంది. కియారా అద్వానీ ఈ చిత్రంలో హీరోయిన్‌ గా నటిస్తున్న విషయం తెల్సిందే.