కాంగ్రెస్ కు రేవంత్ రెడ్డి 'బాహుబలి`: వ‌ర్మ‌

కుక్క పిల్ల‌....అగ్గిపుల్ల‌...సబ్బు బిళ్లా.....కాదేదీ క‌విత‌క‌న‌ర్హం....ఇవి మ‌హాక‌వి శ్రీ‌శ్రీ చెప్పిన మాట‌లు. సినిమాలు.....రాజ‌కీయాలు...స‌మ‌కాలీన అంశాలు....కావేవీ వ‌ర్మ కామెంట్ల‌కు అన‌ర్హం...ఇది తాజాగా నెటిజ‌న్లు చెబుతున్న మాట‌లు. వివిధ అంశాల‌పై త‌నదైన శైలిలో స్పందించ‌డం వివాదాస్ప‌ద ద‌ర్శ‌కుడు రామ్ గోపాల్ వ‌ర్మకు అల‌వాటే. వ‌ర్మ కామెంట్లు కొన్ని సార్లు ఆలోచింప‌జేసేలా ఉంటాయి, మ‌రికొన్ని సార్లు వివాదాస్ప‌ద‌మ‌వుతుంటాయి. ఏది ఏమైనా వ‌ర్మ మాత్రం త‌న‌కు రాజ్యాంగం ఇచ్చిన భావ వ్య‌క్తీక‌ర‌ణ హ‌క్కును విచ్చ‌ల‌విడిగా వాడేస్తుంటాడు. అర్జున్ రెడ్డి, ల‌క్ష్మీస్ ఎన్టీఆర్‌ - ప‌వ‌న్ క‌ల్యాణ్ ల‌పై వ‌ర్మ త‌న‌దైన శైలిలో వ్యాఖ్య‌లు చేసిన సంగ‌తి తెలిసిందే. తాజాగా, వ‌ర్మ.... రాజ‌కీయాల‌పై త‌న విమ‌ర్శ‌నాస్త్రాల‌ను ఎక్కు పెట్టాడు. కాంగ్రెస్ లో చేరిన రేవంత్ రెడ్డిని బాహుబ‌లిగా అభివ‌ర్ణిస్తూ వ‌ర్మ సోష‌ల్ మీడియాలో చేసిన పోస్ట్ వైర‌ల్ అయింది.

తెలంగాణలో టీడీపీ కీల‌క‌నేత రేవంత్ రెడ్డి....ఆ పార్టీకి గుడ్ బై చెప్పిన సంగ‌తి తెలిసిందే. ఈ సంద‌ర్భంగా రేవంత్ ను ఆకాశానికెత్తేస్తూ వ‌ర్మ ఫేస్ బుక్ లో ఓ పోస్ట్ పెట్టాడు. త‌న‌దైన శైలిలో రేవంత్ పై ప్ర‌శంస‌లు కురిపించాడు. కాంగ్రెస్ పార్టీలో రేవంత్ చేరడం తనకెంతో సంతోషాన్ని కలిగించిందన్నాడు వ‌ర్మ‌. కాంగ్రెస్ పార్టీకి రేవంత్ ఓట్ల వ‌ర్షం కురిపిస్తాడ‌ని వ‌ర్మ కితాబిచ్చాడు. రేవంత్ చేరిక‌తో త‌న‌కు కాంగ్రెస్ పార్టీ మీద మళ్లీ నమ్మకం వచ్చింద‌ని వ‌ర్మ చెప్పాడు. కాంగ్రెస్ పార్టీని  ఫిల్మ్ థియేటర్ తో, రేవంత్ రెడ్డిని 'బాహుబలి`తో పోల్చాడు వ‌ర్మ‌.  'బాహుబలి 'బాక్సాఫీస్` కి నోట్ల వర్షం కురిపిస్తే రేవంత్ రెడ్డి కాంగ్రెస్ కి ఓట్ల వర్షం కురిపిస్తాడ‌ని వ్యాఖ్యానించాడు. ప్ర‌స్తుతం రెండు తెలుగు రాష్ట్రాల‌లో హాట్ టాపిక్ అయిన రేవంత్ రెడ్డి ఇష్యూపై వ‌ర్మ చేసిన పోస్ట్ వైర‌ల్ అయింది.

రేవంత్ రెడ్డి కాంగ్రెస్ పార్టీ లో చేరడం నాకు చాలా చాలా హ్యాపీ

రేవంత్ రెడ్డి చేరటం మూలాన నాకు కాంగ్రెస్ పార్టీ మీద మళ్ళి నమ్మకం వచ్చింది

కాంగ్రెస్ పార్టీ ఫిల్మ్ థియేటర్ అయితే రేవంత్ రెడ్డి బాహుబలి

బాహుబలి బాక్సాఫీస్ కి నోట్ల వర్షం కురిపిస్తే రేవంత్ రెడ్డి కాంగ్రెస్ కి ఓట్ల వర్షం కురిపిస్తాడు