'రిపబ్లిక్': అధికారం మాత్రమే శాశ్వతమని భావించే పవర్ ఫుల్ పాత్రలో రమ్యకృష్

సుప్రీమ్ హీరో సాయి తేజ్‌ నటిస్తున్న తాజా చిత్రం ''రిపబ్లిక్''. 'ప్రస్థానం' ఫేమ్ దేవ కట్టా ఈ పొలిటికల్ థ్రిల్లర్ ని తెరకెక్కిస్తున్నారు. ప్రస్తుత రాజకీయ పరిస్థితులను ప్రశ్నిస్తూ ప్రజల సమస్యలపై పోరాటం చేసే యువకుడి పాత్రలో సాయితేజ్ నటిస్తున్నాడు. ఇందులో ఐశ్వర్య రాజేష్ హీరోయిన్ గా నటిస్తోంది. జీ స్టూడియోస్ సమర్పణలో జె.బి.ఎంటర్టైన్మెంట్స్ బ్యాన‌ర్‌ పై జె.భగవాన్ - జె.పుల్లారావు ఈ చిత్రాన్ని నిర్మిస్తున్నారు. ఇప్పటికే విడుదలైన ఫస్ట్ లుక్ - మోషన్ పోస్టర్ మంచి స్పందన తెచ్చుకున్నాయి. ఈ క్రమంలో తాజాగా 'రిపబ్లిక్' లో కీలక పాత్ర పోషిస్తున్న సీనియర్ నటి రమ్యకృష్ణ లుక్ ని చిత్ర యూనిట్ రిలీజ్ చేశారు .

"తప్పూ ఒప్పులు లేవు.. అధికారం మాత్రమే శాశ్వతం'' అంటూ 'రిపబ్లిక్' చిత్రంలో ఆమె పాత్ర స్వభావాన్ని తెలియజేస్తున్న ఈ పోస్టర్ ఆకట్టుకుంటోంది. ఇందులో రమ్యకృష్ణ పవర్‌ ఫుల్ రాజకీయ నాయకురాలు విశాఖ వాణిగా కనిపించబోతోంది. మరోసారి రమ్యకృష్ణ పవర్‌ ఫుల్ ఫెర్ఫామెన్స్‌ ని ఈ చిత్రంలో చూడబోతున్నామని ఫస్ట్ లుక్ చూస్తేనే అర్థం అవుతుంది. ఇకపోతే ఈ చిత్రంలో విలక్ష‌ణ న‌టుడు జ‌గ‌ప‌తిబాబు కీలక పాత్రలో న‌టిస్తున్నారు. మెలోడీ బ్ర‌హ్మ మ‌ణిశ‌ర్మ ఈ సినిమాకి సంగీతం అందిస్తున్నారు. ఎమ్.సుకుమార్ సినిమాటోగ్రాఫర్ గా వ్యవహరిస్తుండగా.. కేఎల్ ప్రవీణ్ ఎడిటింగ్ వర్క్ చేస్తున్నాడు. 'రిపబ్లిక్' చిత్రాన్ని వ‌ర‌ల్డ్‌ వైడ్‌ గా జూన్ 4న విడుదల చేయనున్నారు.