రాజమౌళి మల్టీస్టారర్లో విలన్..ఐడియా బావుందట

జూనియర్ ఎన్టీఆర్.. రామ్ చరణ్ కాంబినేషన్లో రాజమౌళి తీయబోయే మెగా మల్టీస్టారర్లో ఇంకో హీరోకు కూడా చోటుందని.. ఒక సీనియర్ హీరో ఇందులో విలన్ పాత్ర చేస్తాడని కొన్ని రోజులుగా గట్టి ప్రచారమే జరుగుతోంది. ఆ సీనియర్ హీరో మరెవరో కాదు.. మాస్ రాజా రవితేజానే అంటూ కూడా గుసగుసలు వినిపించాయి. రాజమౌళికి రవితేజకు మంచి స్నేహం ఉన్న నేపథ్యంలో ఇది నిజమే అయ్యుంటుందని కూడా అనుకున్నారు. ఐతే ఆ ఊహాగానాలపై మాస్ రాజా నీళ్లు చల్లేశాడు. ‘టచ్ చేసి చూడు’ ప్రమోషన్లలో భాగంగా ట్విట్టర్లో అభిమానులతో చిట్ చాట్ చేసిన మాస్ రాజా.. రాజమౌళి సినిమాలో విలన్ పాత్ర చేస్తున్నారటగా అని అడిగితే.. ఏదేదో ఊహించుకోవద్దు అంటూ సెలవిచ్చాడు. కానీ దాంతో పాటుగా ‘‘ఈ ఐడియా బాగుంది’’ అంటూ కామెంట్ చేయడం విశేషం.

ఇక ‘అన్నయ్య’ తర్వాత మళ్లీ మెగాస్టార్ చిరంజీవితో ఎప్పుడు సినిమా చేస్తారు అని అడిగితే.. తప్పకుండా చేస్తానన్న మాస్ రాజా.. తన క్లోజ్ ఫ్రెండ్ పూరి జగన్నాథ్ తో మళ్లీ సినిమా చేసే విషయంపైనా స్పందించాడు. త్వరలోనే తమ కాంబినేషన్లో సినిమా ఉండొచ్చన్నాడు. నాని మంచి స్నేహితుడు కావడం వల్ల.. తన గొంతే బాగుంటుందని ఫీలవడం వల్ల ‘అ’ సినిమాకు వాయిస్ ఓవర్ ఇవ్వడానికి అంగీకరించానన్న రవితేజ.. మంచి స్క్రిప్టు దొరికితే మల్టీస్టారర్ చేయడానికి తాను ఎప్పుడూ సిద్ధమే అన్నాడు. నిర్మాతగా సినిమా ఎప్పుడు తీస్తారని అడిగితే.. ‘‘నేను నటుడిని’’ అని ఒక్క ముక్కలో సమాధానం ఇవ్వడం ద్వారా తాను ప్రొడక్షన్లోకి దిగే అవకాశం లేదని చెప్పకనే చెప్పేశాడు మాస్ రాజా.