'పవర్ స్టార్' కోసం 'జనసేన' పార్టీ సింబల్ వాడుకున్న సెన్సేషనల్ డైరెక్టర్...!

సెన్సేషనల్ డైరెక్టర్ రామ్ గోపాల్ వర్మ ఇటీవల 'పవర్ స్టార్' అనే సినిమా అనౌన్స్ చేసి సంచలనం రేపిన సంగతి తెలిసిందే. ఈ సినిమాలో పీకే, ఎమ్మెస్, ఎన్ బీ, టీఎస్ మరియు ఓ రష్యన్ మహిళ - నలుగురు పిల్లలు - ఎనిమిది గేదెలు మరియు ఆర్జీవీ నటించనున్నారని ప్రకటించి అందరిని షాక్ కి గురి చేశారు. ఇక ఈ సినిమా కోసం పవర్ స్టార్ పవన్ కళ్యాణ్ ని పోలిన వ్యక్తిని హీరోగా పరిచయం చేసాడు. దీంతో పవన్ కళ్యాణ్ ఫ్యాన్స్ సోషల్ మీడియా వేదికగా వర్మపై తీవ్ర స్థాయిలో విరుచుకుపడుతున్నారు. ఈ నేపథ్యంలో ఆర్జీవీ వారి ఆగ్రహానికి ఆజ్యం పోసినట్లు 'పవర్ స్టార్' టైటిల్ పోస్టర్ ట్విట్టర్ వేదికగా రిలీజ్ చేశాడు.

'పవర్ స్టార్' టైటిల్ లోగో మధ్యలో పవన్ కళ్యాణ్ స్థాపించిన 'జనసేన' పార్టీ ఎలక్షన్ సింబల్ అయిన 'గ్లాస్' ని వాడాడు. దీంతో 'జనసేన' కార్యకర్తలు.. పవన్ కళ్యాణ్ అభిమానులు వర్మ పై ఫైర్ అవుతున్నారు. కాగా రామ్ గోపాల్ వర్మ 'పవర్ స్టార్' సినిమా ఫస్ట్ లుక్ పోస్టర్ ఈ రోజు ఉదయం 11.37 గంటలకు రిలీజ్ చేయబోతున్నట్లు చెప్పుకొచ్చారు. వర్మ ట్వీట్ చేస్తూ.. ''ఆర్జీవీ వరల్డ్ థియేటర్ ఉదయం 11.37 గంటలకు POWER STAR మూవీ యొక్క ఫస్ట్ లుక్ పోస్టర్‌ ను విడుదల చేస్తోంది.. ఇది పూర్తిగా కల్పిత చిత్రం. ఏదైనా నిజమైన వ్యక్తులతో పోలిక ఉంటే అది యాదృచ్చికంగా జరిగింది మాత్రమే'' అని పేర్కొన్నారు. మరి 'పవర్ స్టార్' ఫస్ట్ లుక్ పోస్టర్‌ తో వర్మ ఎలాంటి సంచలనాలు రేపుతాడో చూడాలని సినీ అభిమానులు ఆసక్తిగా ఎదురుచూస్తున్నారు.