కోలీవుడ్ లో రష్మికకు పెరుగుతున్న డిమాండ్!

తెలుగు .. తమిళ భాషల్లో రష్మిక ఒక రేంజ్ లో దూసుకుపోతోంది. ఈ పిల్ల కనురెప్పలతో చేసే కోలాటానికి కుర్రాళ్లు ఫిదా అవుతున్నారు. నవ్వితే ముత్యాలు రాలడమంటే ఏమిటో .. ఈ పిల్ల నవ్విన తరువాతనే అర్థమైందని అంటున్నారు. గులాబీ గుత్తులు ... చామంతి చెండ్లు కలిపి చేసినట్టుగా ఈ కలర్ ఏంట్రా బాబూ అంటూ కుర్రాళ్లు తెగ ఇదై పోతున్నారు. దేనికైనా అదృష్టం ఉండాలంటారు .. అలాంటి అదృష్టాన్ని ఈ అమ్మాయి అరచేతిలో పట్టుకుని ఇండస్ట్రీకి వచ్చినట్టుంది. వరుస హిట్లు కొట్టేసుకుంటూ వెళుతోంది.

అడపాదడపా కన్నడ ... ఆపై అన్నీ తెలుగే అన్నట్టుగా ఈ సుందరి తన కెరియర్ ను పరిగెత్తిస్తోంది. తెలుగులో పూజా హెగ్డే తరువాత ఆ రేంజ్ సక్సెస్ గ్రాఫ్ ఉన్న కథానాయికగా రష్మిక కనిపిస్తోంది. క్రితం ఏడాది 'సరిలేరు నీకెవ్వరు' .. 'భీష్మ' సినిమాలతో భారీ విజయాలను అందుకున్న రష్మిక, ప్రస్తుతం సుకుమార్ దర్శకత్వంలో 'పుష్ప' సినిమా చేస్తోంది. కొన్ని సినిమాలు సెట్స్ పై ఉండగానే హిట్టైపోతుంటాయి. అలాంటి లక్షణాలు 'పుష్పకు పుష్కలంగా ఉండటంతో, రష్మిక ఫుల్ హ్యాపీగా ఉంది. ఇక తమిళ .. హిందీ భాషల్లో ఎంట్రీ ఇవ్వడానికి కూడా ఇదే సరైన ముహూర్తంగా ఆమె ఫిక్స్ అయింది.

అలా తమిళంలో ఆమె కార్తి జోడీగా 'సుల్తాన్' చేసింది. తెలుగులో ఫరవాలేదనిపించుకున్న ఈ సినిమా, సహజంగానే తమిళంలో మరికాస్త జోరు చూపించింది. తమిళ ప్రేక్షకులకు ఈ పిల్ల అందం .. అల్లరి నచ్చాయి. అక్కడి దర్శక నిర్మాతల దృష్టిని కూడా రష్మిక బాగానే ఆకర్షించిందని అంటున్నారు. త్వరలో ఈ అమ్మాయి అక్కడ సూర్య .. విక్రమ్ .. విశాల్ వంటి హీరోల సరసన కనిపించే అవకాశాలు ఉన్నాయని చెప్పుకుంటుంన్నారు. చూస్తుంటే రష్మిక కోలీవుడ్ ను కూడా చున్నీకి చుట్టేసుకునేలానే ఉంది.