రూటు మార్చిన జార్జ్‌ రెడ్డి హీరో

యంగ్ హీరో సందీప్‌ మాధవ్‌ వరుసగా వంగవీటి మరియు జార్జ్‌ రెడ్డి సినిమాల్లో నటించడంతో అతడు సీరియస్‌ నటుడిగా ముద్ర పడ్డాడు. వరుసగా అతడు చేస్తున్న సినిమాల వల్ల అతడికి ఒక రకమైన ఇమేజ్‌ దక్కింది. అయితే ఇప్పుడు ఆ ఇమేజ్‌ ను చెరిపేసుకునేందుకు సందీప్‌ ప్రయత్నాలు చేస్తున్నారు. జార్జ్‌ రెడ్డి విజయం తర్వాత కాస్త స్లో అయిన ఈ యువ హీరో తాజాగా జీవీ మధు కిరణ్‌ దర్శకత్వంలో ఒక రొమాంటిక్‌ ఎంటర్‌ టైనర్‌ ను చేసేందుకు సిద్దం అయ్యాడు. దర్శకుడు కేఎస్‌ రవీంద్ర వద్ద సుదీర్ఘ కాలంగా రచయితగా వ్యవహరిస్తున్న మధు కిరణ్‌ ఈ సినిమాతో దర్శకుడిగా పరిచయం కాబోతున్నాడు.

ఈ సినిమా ఒక రొమాంటిక్‌ ఎంటర్‌టైనర్‌ గా రూపొందుతున్నట్లుగా వార్తలు వస్తున్నాయి. ప్రస్తుతం సినిమాకు సంబంధించిన స్క్రిప్ట్‌ వర్క్‌ జరుగుతోంది. సందీప్‌ మాధవ్‌ ఈ సినిమాతో తన ఇమేజ్‌ ను మార్చకుని లవర్‌ బాయ్‌ గా గుర్తింపు తెచ్చుకుంటాడేమో చూడాలి. గత సినిమాలతో పోల్చితే ఈ సినిమాలో సందీప్‌ మాధవ్‌ లుక్‌ చాలా విభిన్నంగా ఉంటుందని అంటున్నారు. కాస్త సన్నబడటంతో పాటు లుక్‌ పరంగా కూడా మార్పు వచ్చింది. రెండు సినిమాల్లో కూడా సీరియస్ గా కనిపించిన ఆయన ఈ సినిమాలో మాత్రం నవ్వుతూ నవ్విస్తూ ఉంటాడని అంటున్నారు. ఈ సినిమా తర్వాత సందీప్‌ వరుస సినిమాలతో బిజీ అయ్యేనో చూడాలి.