మహేష్ సినిమా గురించి ఆ లెజెండ్..

సంతోష్ శివన్.. భారత దేశం గర్వించదగ్గ ఛాయాగ్రాహకుల్లో ఒకడు. ఇండియాలో అత్యధిక పురస్కారాలు పొందిన సినిమాటోగ్రాఫర్ అతనే. పదికి పైగా జాతీయ అవార్డులు.. 20కి పైగా అంతర్జాతీయ పురస్కారాలు అందుకున్న సంతోష్ శివన్.. గత కొన్నేళ్లలో ఛాయాగ్రహణంపై అంతగా దృష్టిపెట్టట్లేదు. దర్శకుడిగా.. నిర్మాతగా.. అనేక పాత్రలు పోషిస్తున్నాడు. చాలా సెలెక్టివ్ గా సినిమాలు ఎంచుకుంటున్నాడు. బయటి సినిమాలకు పని చేయడం బాగా తగ్గించేశాడు. ఇలాంటి టైంలో మురుగదాస్ తన కొత్త సినిమాకు పని చేయడానికి సంతోష్ శివన్ ను ఒప్పించాడు. మురుగ-మహేష్ బాబు కాంబినేషన్లో తెరకెక్కుతున్న సినిమాకు ఆయనే ఛాయాగ్రాహకుడు.

దేశంలోనే మోస్ట్ హ్యాండ్సమ్ హీరోల్లో ఒకడైన మహేష్ బాబు సంతోష్ శివన్ కెమెరాలో ఎలా ఉంటాడా అన్న ఆసక్తి ప్రేక్షకుల్లో ఉంది. కచ్చితంగా మహేష్ ను సరికొత్తగా సంతోష్ ప్రెజెంట్ చేస్తాడని భావిస్తున్నారు. సంతోష్ ఓకే చేశాడంటేనే ఆ ప్రాజెక్టు చాలా స్పెషల్ అన్న ఫీలింగ్ జనాల్లో ఉంది. తాజాగా ఈ చిత్రానికి సంబంధించి ఓ ఫ్లై ఓవర్ కింద సన్నివేశాలు చిత్రీకరిస్తున్న ఫొటోను సంతోష్ ట్విట్టర్లో షేర్ చేశాడు. ఇది మురుగదాస్-మహేష్ బాబు సినిమాకు సంబంధించిన వర్కింగ్ స్టిల్ అని.. యూనిట్లో అందరూ హార్డ్ వర్కింగ్ అని కితాబిచ్చాడు సంతోష్ శివన్. మురుగ దర్శకత్వంలో వచ్చిన ‘తుపాకి’కి కూడా సంతోషే ఛాయాగ్రహణం అందించాడు. అందులో ఆయన పనితనం టాప్ క్లాస్ అని ప్రత్యేకంగా చెప్పాల్సిన పని లేదు. మహేష్ సినిమాకు ఈ లెజెండ్ ఎలాంటి లుక్ తీసుకొస్తాడో చూడాలి.