కామెడీ హీరోకు ఆ టైటిల్ ఏంటి బాసు?

చిన్న కమెడియన్‌ గా ప్రేక్షకులకు పరిచయం అయ్యి ‘ప్రేమ కథా చిత్రమ్‌’లో మంచి కామెడీని పండివ్వడం వల్ల ఒక్కసారిగా స్టార్‌ కమెడియన్‌ గా మారిపోయిన సప్తగిరి, కమెడియన్‌ గా కొంత కాలం సినిమాలు చేసి ప్రస్తుతం వరుసగా హీరోగా సినిమాలు చేస్తున్నాడు. ఇప్పటికే ఈయన ‘సప్తగిరి ఎల్‌ ఎల్‌ బి’ - ‘సప్తగిరి ఎక్స్‌ ప్రెస్‌’ చిత్రాలు చేశాడు. ప్రస్తుతం అరుణ్‌ పవార్‌ దర్శకత్వంలో హీరోగా సప్తగిరి మరో సినిమాను చేస్తున్నాడు. ఆ సినిమాకు సంబంధించిన టైటిల్‌ తాజాగా రివీల్‌ చేశారు.

సప్తగిరి హీరోగా - అరుణ్‌ పవార్‌ దర్శకత్వంలో రూపొందుతున్న సినిమాకు ‘వజ్ర కవచధర గోవింద’ అనే పవర్‌ ఫుల్‌ టైటిల్‌ ను ఖరారు చేశారు. ఈ విషయాన్ని తాజాగా చిత్ర యూనిట్‌ సభ్యులు అధికారికంగా ప్రకటించారు. ఈ చిత్రంలో సప్తగిరి పోషిస్తున్న పాత్ర పేరు గోవింద, అందుకే ఈ టైటిల్‌ ను ఖరారు చేసినట్లుగా దర్శకుడు చెప్పుకొచ్చాడు. కథకు పూర్తిగా యాప్ట్‌ అయ్యేలా ఈ టైటిల్‌ ను ఖరారు చేసినట్లుగా ఆయన పేర్కొన్నాడు.

సప్తగిరి మూవీ టైటిల్‌ పై మిశ్రమ స్పందన వస్తోంది. కామెడీ హీరో మూవీకి ఇంత పవర్‌ ఫుల్‌ టైటిల్‌ ఏంటీ అంటూ కొందరు ప్రశ్నిస్తున్నారు. కామెడీ మూవీకి ఏదైనా కామెడీ టైటిల్‌ పెడితే ప్రేక్షకుల నుండి మంచి రెస్పాన్స్‌ వస్తుంది కాని, ఇలా సప్తగిరి మూవీకి వజ్ర కవచధర గోవింద అంటూ పెట్టడం ఏంటీ అంటూ ప్రశ్నిస్తున్నారు. సప్తగిరి ఇమేజ్‌ కు ఆ టైటిల్‌ ఎట్టి పరిస్థితుల్లో సూట్‌ అవ్వదని కొందరు కామెంట్‌ చేస్తున్నారు. సప్తగిరి నుండి ఎలాంటి సినిమా అయితే ప్రేక్షకులు ఆశిస్తున్నారో అచ్చు అలాగే ఈ సినిమా ఉంటుందని దర్శకుడు చెబుతున్నాడు. మరి టైటిల్‌ చూస్తేనేమో కాస్త పవర్‌ ఫుల్‌ గా ఉంది. మరి సినిమా ఎలా ఉంటుందో చూడాలి.