సెన్సేషనల్ డైరెక్టర్.. అక్కినేని కాంపౌండ్లో?

గత ఏడాది పెద్ద సినిమాల్లో ‘రంగస్థలం’ ఎంతటి సంచలనమో.న. చిన్న చిత్రాల్లో ‘ఆర్ ఎక్స్ 100’ కూడా అంతటి సంచలనమే. పెట్టుబడి-రాబడి కోణంలో చూస్తే ‘రంగస్థలం’ కంటే ఇది పెద్ద హిట్. ఈ కోణంలతోనే చూస్తే గత ఏడాదే కాదు.. గత కొన్నేళ్లలో తెలుగులో వచ్చిన అతి పెద్ద విజయాల్లో ‘ఆర్ ఎక్స్ 100’ను ఒకటిగా చెప్పొచ్చు. ఈ చిత్రంతో దర్శకుడిగా పరిచయం అయిన అజయ్ భూపతి పేరు టాలీవుడ్లో మార్మోగిపోయింది. కొత్త హీరో హీరోయిన్లను పెట్టి ఓ కొత్త దర్శకుడు అంత బోల్డ్‌ గా సినిమా తీసి హిట్టు కొట్టడం ఆశ్చర్యమే. ఈ చిత్రం తర్వాత అజయ్‌ కు మంచి మంచి అవకాశాలు వస్తున్నట్లు వార్తలొచ్చాయి. నితిన్‌ తో అతడి రెండో సినిమా అని ఒక దశలో ప్రచారం జరిగింది. కానీ తర్వాత బెల్లంకొండ శ్రీనివాస్ పేరు తెరపైకి వచ్చింది. కానీ కారణాలేంటో తెలియదు కానీ.. ఈ రెండు ప్రాజెక్టులూ క్యాన్సిల్ అయ్యాయి.

తాజా సమాచారం ప్రకారం అజయ్ అక్కినేని కాంపౌండ్లోకి ఎంటరయ్యాడట. నాగచైతన్యతో తన రెండో సినిమా చేయాలని చూస్తున్నాడట. బెల్లంకొండ శ్రీనివాస్‌ తో అనుకున్న కథనే చైతూ ఇమేజ్‌ కు తగ్గట్లుగా మార్చి సినిమా చేయాలని చూస్తున్నాడట. చైతూ కెరీర్లో హిట్లు ఉన్నాయి కానీ.. అవన్నీ ప్రేమకథలతో వచ్చినవే. యాక్షన్ సినిమాలతో అతడికి ఎప్పుడూ ఎదురు దెబ్బలే తగిలాయి. అజయ్ చైతూతో ఆ జానర్లోనే సినిమా చేేయాలనుకుంటున్నట్లు తెలుస్తోంది. ఈ చిత్రంలో మరో హీరోగా కూడా నటిస్తాడట. బెల్లంకొండ శ్రీనివాస్‌ తో ఈ సినిమా అనుకున్నపుడు.. కథానాయికగా సమంతను ఫిక్స్ చేసుకున్నాడు అజయ్. మరి ఇప్పుడు చైతూతో సినిమా ఓకే అయినా సమంత ఈ చిత్రంలో నటిస్తుందా లేదా అన్నది తెలియడం లేదు. ఎందుకంటే ఇటీవలే ‘మజిలీ’లో కలిసి నటించిన ఈ జంట మళ్లీ జోడీ కట్టడానికి ఒప్పుకుంటుందా.. పైగా తమకు లవ్ స్టోరీలే కలిసొచ్చిన నేపథ్యంలో ఈ యాక్షన్ సినిమాలో కలిసి నటించడానికి ఓకే అంటుందా అన్నది సందేహం. ముందు అసలు చైతూ ఈ చిత్రాన్ని ఓకే చేస్తాడా లేదా అన్నది చూడాలి.