2.0 టీజర్.. టైం చెప్పేశారు

ఇప్పుడు భారతీయ సినీ ప్రేక్షకుల దృష్టంతా ‘2.0’ టీజర్ మీదే ఉంది. సుదీర్ఘ నిరీక్షణకు తెర దించుతూ వినాయక చవితి కానుకగా గురువారం టీజర్ లాంచ్ చేయబోతున్నట్లు కొన్ని రోజుల కిందటే ప్రకటించిన సంగతి తెలిసిందే. ఐతే పక్కాగా ఏ సమయానికి టీజర్ లాంచ్ అవుతుందో మాత్రం వెల్లడించలేదు. తాజాగా శంకర్ ఈ సంగతి చెప్పేశారు. చవితి రోజు ఉదయం 9 గంటలకే టీజర్ లాంచ్ చేయనున్నట్లు శంకర్ ప్రకటించాడు. దీంతో సోషల్ మీడియాలో ‘2.0’ కౌంట్ డౌన్ మొదలైపోయింది. ఉదయమే టీజర్ వచ్చేస్తుండటంతో రేపు పూర్తిగా సోషల్ మీడియా ‘2.0’ మోతతో హీటెక్కిపోవడం ఖాయం. ఇండియన్ సినిమాల టీజర్ రికార్డులన్నింటినీ ఇది బద్దలు కొట్టేస్తుందని అంచనా వేస్తున్నారు.

‘2.0’ టీజర్ మామూలుగా సోషల్ మీడియాలో లాంచ్ కావట్లేదు. ‘బాహుబలి’ తరహాలో దీన్ని కూడా నేరుగా థియేటర్లలో ప్రదర్శించబోతున్నారు. దీని ప్రత్యేకత ఏంటంటే.. టీజర్‌ ను త్రీడీ వెర్షన్లో రిలీజ్ చేస్తున్నారు. ఒక మొబైల్ నంబర్ ఇచ్చి దానికి మిస్డ్ కాల్ ఇవ్వడం ద్వారా థియేటర్లో ఉచితంగా టీజర్ చూసే అవకాశం కల్పిస్తున్నారు. థియేటర్లలో త్రీడీ కళ్లద్దాలు కూడా అందుబాటులో ఉంచబోతున్నారు. దీంతో పాటుగానే సోషల్ మీడియాలో మామూలు టీజర్ కూడా అందుబాటులో ఉంటుంది. ఏ టెక్నాలజీని ఉపయోగించినా పర్ఫెక్షన్ కోసం ప్రయత్నించే శంకర్.. తొలిసారిగా త్రీడీలో ‘2.0’ సినిమా తీశాడు కాబట్టి తన ప్రత్యేకతను చాటుతాడనే భావిస్తున్నారు. మరి టీజర్లో చిట్టి రోబోగా రజనీకాంత్ విన్యాసాలు ఎలా ఉంటాయో... అక్షయ్ కుమార్ ఎలా కనిపిస్తాడో.. ఇంకా ఇందులో ఏమేం హైలైట్లు ఉంటాయో చూడాలి. ఈ చిత్రం నవంబరు 29న ప్రేక్షకుల ముందుకు రానున్న సంగతి తెలిసిందే.