'పెళ్లికాని ప్రసాద్'గా యువహీరో.. క్లిక్ అవుతాడా??

యువహీరో శర్వానంద్ 'శతమానం భవతి' సినిమా తర్వాత అలాంటి కమర్షియల్ హిట్ అందుకోలేకపోయాడు. చేసిన సినిమాలన్ని బాక్సాఫీస్ దగ్గర బోల్తాకొడుతూ వచ్చాయి. ఇటీవలే శ్రీకారం అనే సినిమా చేసాడు. వ్యవసాయం నేపథ్యంలో తెరకెక్కిన ఈ సినిమాకు హైప్ బాగానే క్రియేట్ అయింది. కానీ సినిమాలో రొటీన్ కంటెంట్ అని ప్రేక్షకుల ఆదరణకు దూరమైంది. ఎంత మెసేజ్ ఓరియెంటెడ్ సినిమా అయినా జనాలకు వినోదం లేకపోతే చూడటం మానేశారు. ఆ విధంగానే శ్రీకారం విషయంలో దెబ్బపడింది. అయితే శర్వానంద్ సినిమాలు సీరియస్ గానే చేస్తున్నాడు. కానీ సినిమాల ఎంపిక విషయంలో తప్పిదం జరిగిందేమో అందుకే వరుసగా ప్లాప్స్ ఖాతాలో వేసుకున్నాడు. ప్రస్తుతం శర్వా మంచి కమర్షియల్ హిట్ కోసం వెయిట్ చేస్తున్నాడు. కానీ శర్వా నుండి త్వరలో రాబోతున్న మహాసముద్రం సినిమా కూడా సీరియస్ డ్రామాగా సాగనుంది.

సీరియస్ డ్రామా అయితే కథనం బిగువుగా లేకపోతే ప్రేక్షకులు ఎలాంటి ఫలితం అందిస్తారో తెలిసిందే. అయితే మరోసారి కామిక్ రోల్ తో అలరించేందుకు సిద్ధం అవుతున్నాడు శర్వా. రెడ్ ఫేమ్ కిషోర్ తిరుమల దర్శకత్వంలో శర్వా.. 'ఆడాళ్ళు మీకు జోహార్లు' అనే సినిమా చేయనున్నాడు. ప్రస్తుతం స్క్రిప్ట్ దశలో ఉన్న ఈ సినిమా త్వరలోనే పట్టాలెక్కనుంది. అయితే ఈ సినిమాలో శర్వా.. 'పెళ్లికాని ప్రసాద్' అనే పాత్రలో కనిపించనున్నట్లు తెలుస్తుంది. ఇదివరకు పెళ్లికానీ ప్రసాద్ పాత్రలో విక్టరీ వెంకటేష్ 'మల్లీశ్వరి' సినిమాలో నటించాడు. ఆ కామిక్ రోల్ సూపర్ హిట్ అయింది. అలాంటి సరదా పాత్రలు జనాల్లోకి ఈజీగా వెళ్తాయనే ఆలోచనతో శర్వా ఈ సినిమాకు సైన్ చేసాడని సమాచారం. ఈ సినిమాలో శర్వాకు జోడిగా రష్మిక మందన నటించనుంది.