భారీ ప్లాన్ లో ఉన్న బాహుబలి నిర్మాతలు

తెలుగు సినిమా పరిథిని అమాంతం పెంచిన 'బాహుబలి' సినిమాకు దర్శకుడు రాజమౌళి అయినప్పటికీ ఆయన విజన్ ను నమ్మడమే కాకుండా నిర్మాణంలో రాజీపడకుండా మద్దతు ఇచ్చి ఆ సినిమాను ప్రేక్షకుల ముందుకు రావడంలో కీలక పాత్ర పోషించినవారు 'బాహుబలి' నిర్మాతలు  శోభు యార్లగడ్డ.. ప్రసాద్ దేవినేని.   ఇప్పుడు వారు ఆర్కా మీడియాను మరింత భారీ ప్లాన్లతో ముందుకు తీసుకెళ్ళే ప్రయత్నాలలో ఉన్నారట.

ఈసారి 'బాహుబలి' నిర్మాతల దృష్టి డిజిటల్ ప్లాట్ ఫామ్స్ పై పడిందట. అందుకే లీడింగ్ డిజిటల్ ప్రొవైడర్ల కోసం కంటెంట్ అందించే వెబ్ సీరీస్ నిర్మాణంపై ఫోకస్ చేస్తున్నారట.  ఈమధ్యే హైదరాబాద్ లోని ఒక పోష్ ఏరియాలో ఒక విలాసవంతమైన ఆఫీసును సెటప్ చేశారట. యువ దర్శకులు.. టాలెంటెడ్ రైటర్స్ తీసుకొచ్చే వెబ్ సీరీస్ కంటెంట్ కోసం ఎదురు చూస్తున్నారట. ఇప్పటికే అలాంటి ఫిలిం మేకర్స్ తీసుకుకొచ్చిన కాన్సెప్టులను ఒక టీమ్ జల్లెడ పడుతోందట.  వాటిలో ఫైనలైజ్ అయిన కొన్ని కాన్సెప్టుల స్క్రిప్ట్ వర్క్.. ప్రీప్రొడక్షన్ ను శోభు యార్లగడ్డ స్వయంగా పరిశీలిస్తున్నారట.

త్వరలో ఆర్కా మీడియా వారినుంచి ఈ వెబ్ సీరీస్ లకు సంబంధించి భారీ ప్రకటనలు రాబోతున్నాయని సమాచారం.  ఏదేమైనా ఆర్కా మీడియావారి ఈ వెబ్ సీరీస్ వెంచర్లతో యువ ఫిలిం మేకర్లకు అద్భుతమైన అవకాశాలు దక్కుతాయని భావించవచ్చు.  మరి డిజిటల్ స్పేస్ లో కూడా ఆర్కా వారు తమదైన ముద్రవేస్తారో లేదో వేచి చూడాలి.