సదాశివ్ గా అరుంధతి విలన్

ఒక్క సినిమాతో తన జాతకాన్నే మార్చేసుకున్న బాలీవుడ్ నటుడు సోను సూద్ ని అరుంధతి సినిమా గుర్తున్నంత కాలం మన ప్రేక్షకులు మర్చిపోలేరు. బొమ్మాలి అంటూ పశుపతి పాత్రలో సోను చూపించిన క్రూరత్వం కొన్నేళ్ళ పాటు అలాగే వేటాడింది. తర్వాత కూడా చాలా తెలుగు సినిమాలు చేసాడు కాని ఇది ఇచ్చిన గుర్తింపు ముందు అవి దిగదుడుపే. కమర్షియల్ సినిమాలలో అవకాశాలు రెగ్యులర్ గా దొరికేవే కాని చారిత్రాత్మక కథల్లో వేషం అంటేనే ఏ నటుడికైనా ఛాలెంజ్ గా ఉంటుంది. ప్రస్తుతం సోను సూద్ ఆ అవకాశాన్ని పూర్తిగా దొరకబుచ్చుకున్నట్టే ఉన్నాడు. గౌతమి పుత్ర శాతకర్ణితో విమర్శకులను సైతం మెప్పించిన దర్శకుడు క్రిష్ రూపొందిస్తున్న మణికర్ణికలో సోను సూద్ ఒక కీలక పాత్ర పోషిస్తున్నాడు. దాని లుక్ లీక్ వైరల్ అయిపోయి ఇప్పుడు టాపిక్ గా మారింది.

ఇక్కడ చూస్తున్న స్టిల్ సోను సూద్ వేషానికి సంబంధించి మణికర్ణిక సినిమాలోనిదే. వీరనారి ఝాన్సీ లక్ష్మి బాయ్ జీవిత కథ ఆధారంగా రూపొందుతున్న ఈ ప్రతిష్టాత్మక చిత్రంలో కంగనా రౌనత్ టైటిల్ పాత్ర పోషిస్తున్న సంగతి తెలిసిందే. ఇదే తరహాలో తనకు సంబంధించిన స్టిల్స్ కూడా గతంలోనే బయటికి వచ్చి భారీ రెస్పాన్స్ దక్కించుకున్నాయి. ఈ సినిమా షూటింగ్ లోనే కంగనా రౌనత్ ముక్కుకు తీవ్రంగా గాయమైతే మరోసారి విపరీతమైన చలి జ్వరంతో కొన్ని రోజులు రెస్ట్ తీసుకోవాల్సి వచ్చింది. ఇన్ని కష్టనష్టాలు ఓర్చి తీస్తున్న మణికర్ణిక సినిమాలో సోను సూద్ సదాశివ్ అనే పాత్రలో కనిపిస్తాడు. బాహుబలి కథకుడు విజయేంద్ర ప్రసాద్ కథ అందించిన ఈ మూవీకి సాహో ఫేం శంకర్ ఎహ్సాన్ లాయ్ మ్యూజిక్ అందిస్తున్నారు. ఆగష్టులో విడుదల అనుకుంటున్నప్పటికీ ఇంకా ఎటువంటి నిర్ణయం తీసుకోలేదు.