జక్కన్న ప్రమోషన్‌ తో లక్‌ కలిసి వచ్చేనా?

టాలీవుడ్‌ జక్కన్న రాజమౌళి దర్శకుడిగా ఎంత బిజీగా ఉన్నా కూడా తనకు ఆప్తులు అయిన వారి సినిమాకు, తన మనసుకు నచ్చిన సినిమాలకు తనవంతు సాయం అన్నట్లుగా ప్రచారం చేసేందుకు ముందుకు వచ్చాడు. రాజమౌళి ఒక్క మాట చిన్న సినిమా గురించి మాట్లాడితే ఆ సినిమా స్థాయి అమాంతం పెరిగినట్లే అనే టాక్‌ ఇండస్ట్రీలో ఉంది. అందుకే జక్కన్నతో తమ సినిమా ప్రమోషన్స్‌ చేయించుకునేందుకు ప్రయత్నాలు చేస్తూ ఉంటారు. అతి తక్కువ సినీ వేడుకల్లో హాజరు అయ్యే రాజమౌళి త్వరలో తమిళ హీరో జీవి ప్రకాష్‌ నటించిన ‘సర్వం తాళమయం’ అనే చిత్రం టీజర్‌ లాంచ్‌ చేయబోతున్నాడు.

సంగీత దర్శకుడిగా ఇండస్ట్రీకి పరిచయం అయిన జీవీ ప్రకాష్‌ తనపై రహమాన్‌ అల్లుడు అనే ముద్రను చెడిపేసుకుని పలు సూపర్‌ హిట్‌ లు అందుకున్నాడు. సొంత ప్రతిభతో సక్సెస్‌ లు సాధించుకుంటూ హీరోగా కూడా ఎంట్రీ ఇచ్చాడు. తమిళంలో జీవీ ప్రకాష్‌ పలు చిత్రాల్లో నటించగా అవి తెలుగులో కూడా డబ్‌ అయిన విషయం తెల్సిందే. తాజాగా జీవీ ప్రకాష్‌ నటించిన ఈ చిత్రంకు రాజీవ్‌ మీనన్‌ దర్శకత్వం వహించాడు. సుదీర్ఘ గ్యాప్‌ తర్వాత రాజీవ్‌ మీనన్‌ దర్శకత్వంలో తెరకెక్కిన ఈ చిత్రం పూర్తిగా సంగీతం ప్రాముఖ్య ఉన్న మూవీ అవ్వడం వల్ల స్వయంగా రహమాన్‌ సంగీతాన్ని అందిస్తున్నాడు.

రహమాన్‌ సంగీతంతో పాటు, విభిన్నమైన నేపథ్యంలో తెరకెక్కడం వల్ల ఈ సినిమా టీజర్‌ లాంచ్‌ కు జక్కన్న ముందుకు వచ్చాడు. ఈ చిత్రంపై జక్కన్న కూడా చాలా ఆసక్తిగా ఉన్నట్లుగా తెలుస్తోంది. ఇప్పటి వరకు జీవీ ప్రకాష్‌ కు తెలుగులో పెద్దగా గుర్తింపు దక్కలేదు. జక్కన్న ప్రమోషన్‌ తో జీవీకి ఈ చిత్రంతో అయినా గుర్తింపు దక్కనుందేమో చూడాలి.