గీతా ఆర్ట్స్ లో సుహాష్ 'అంబాజీ పేట మ్యారేజ్ బ్యాండు'

కమెడియన్ గా తనకంటూ ప్రత్యేకమైన గుర్తింపు తెచ్చుకున్న సుహాస్.. 'కలర్‌ ఫొటో' చిత్రంతో హీరోగా మారిన సంగతి తెలిసిందే. తన సహజమైన నటనతో ప్రేక్షకులను మెప్పించి.. తొలి ప్రయత్నంలోనే మంచి విజయం సాధించాడు. దీంతో ఇప్పుడు హాస్యనటుడికి హీరోగా వరుస అవకాశాలు వస్తున్నాయి. ప్రస్తుతం 'రైటర్ పద్మభూషణ్' 'ఫ్యామిలీ డ్రామా' వంటి చిత్రాల్లో సుహాష్ హీరోగా నటిస్తున్నారు. ఈ క్రమంలో తాజాగా మరో కొత్త చిత్రాన్ని ప్రకటించారు.

వైవిధ్యమైన కథలు విలక్షణమైన పాత్రలు ఎంచుకుంటూ వస్తున్న సుహాష్.. ఇప్పుడు ''అంబాజీ పేట మ్యారేజ్ బ్యాండు'' అనే ఆసక్తికరమైన ప్రాజెక్ట్ ని అనౌన్స్ చేశారు. దసరా పండుగను పురస్కరించుకుని ఓ పోస్టర్ ని రిలీజ్ చేశారు. ఇందులో బ్యాండ్ మేళం గెటప్ లో సుహాష్ బ్యాక్ సైడ్ లుక్ ని రివీల్ చేస్తూ.. అతను ఓ ఊరి వైపు చూస్తున్నట్లు చూపించారు. దీని మీద చింతలపూడి (గ్రా) - అంబాజీ పేట (మం) - తూ.గో (జిల్లా) తో పాటుగా పిన్ కోడ్ కనిపిస్తోంది.

ఇది రా అండ్ ఇంటెన్స్ ఫిల్మ్ అని హీరో సుహాష్ సోషల్ మీడియా వేదికగా వెల్లడించారు. జీఏ2 పిక్చ‌ర్స్ - స్వేచ్ఛ క్రియేష‌న్స్ - మ‌హా క్రియేష‌న్స్ బ్యానర్స్ మీద ఈ సినిమా రూపొందుతోంది. 'C/o కంచరపాలెం' ఫేమ్ వెంక‌టేశ్ మ‌హా సమర్పిస్తున్న ఈ చిత్రాన్ని ధీర‌జ్ మోగిలినేని నిర్మిస్తున్నారు. దుశ్యంత్ క‌టిక‌నేని ఈ మూవీకి దర్శకత్వం వహిస్తున్నారు. ''అంబాజీ పేట మ్యారేజ్ బ్యాండు'' చిత్రానికి సంబంధించిన ఇతర వివరాలు త్వరలో వెల్లడి కానున్నాయి.