విశ్వ‌విఖ్యాత, న‌ట సార్వ‌భౌమ నంద‌మూరి తార‌క రామారావు జీవిత చ‌రిత్ర ఆధారంగా `ఎన్టీఆర్ `బ‌యోపిక్ తెరెకెక్కుతోన్న సంగ‌తి తెలిసిందే. విల‌క్ష‌ణ ద‌ర్శ‌కుడు క్రిష్ తెర‌కెక్కిస్తోన్న ఈ బ‌యోపిక్ పై భారీ అంచనాలున్నాయి. బాల‌కృష్ణ న‌టిస్తూ, స‌హ నిర్మాత‌గా వ్య‌వ‌హ‌రిస్తోన్న `ఎన్టీఆర్ `లో కీల‌క పాత్ర‌ల కోసం టాలీవుడ్, బాలీవుడ్ లోని ప్ర‌ముఖ న‌టుల‌ను ఏరికోరి ఎంచుకుంటున్న సంగ‌తి తెలిసిందే. `ఎన్టీఆర్`స‌తీమ‌ణి బ‌స‌వ‌తారకం పాత్రలో బాలీవుడ్ హీరోయిన్ విద్యా బాల‌న్ న‌టిస్తోంది. ఈ బ‌యోపిక్ లో మ‌రో కీలకమైన పాత్రలో ద‌గ్గుబాటి రానా క‌నిపించ‌బోతున్నాడు. ఎన్టీఆర్ అల్లుడు చంద్ర‌బాబు పాత్రలో రానా న‌టించ‌బోతున్న విష‌యం తెలిసిందే. అయితే, ఎన్టీఆర్ బ‌యోపిక్ లో మ‌రో కీలకమైన పాత్ర అయిన ఏఎన్నార్ పాత్రలో ....అక్కినేని వార‌సుడు సుమంత్ న‌టించ‌బోతున్నాడ‌ని కొంత‌కాలంగా పుకార్లు వ‌స్తున్నాయి. తాజాగా, ఆ విష‌యాన్ని సుమంత్ స్వ‌యంగా ధృవీక‌రిస్తూ ట్వీట్ చేశాడు.
`ఎన్టీఆర్` షూటింగ్ శ‌ర‌వేగంగా జ‌రుగుతోంది. వ‌చ్చే ఏడాది సంక్రాంతికి సినిమాను విడుద‌ల చేయాల‌ని బాల‌కృష్ణ కృత నిశ్చ‌యంతో ఉన్నారు. ఇప్ప‌టికే ఒక షెడ్యూల్ షూటింగ్ పూర్తి చేసుకున్న ఈ సినిమాలో నటీనటుల ఎంపిక జరుగుతూనే ఉంది. ఎన్టీఆర్ లో తాను నటించబోతున్నానని రానా నిన్న ట్వీట్ చేసి క‌న్ ఫ‌ర్మ్ చేసిన సంగ‌తి తెలిసిందే. తాజాగా, ఆ ట్వీట్ కు సుమంత్ రీట్వీట్ చేస్తూ...తాను కూడా ఎన్టీఆర్ లో నటించబోతున్నానని రివీల్ చేశాడు. ప్రెస్టీజియ‌స్ ప్రాజెక్ట్ `ఎన్టీఆర్` లో జాయిన్ కాబోతున్నందుకు గ‌ర్వంగా ఉంద‌ని, త‌న తాత‌గారు ఏఎన్నార్ పాత్రలో నటించబోతున్నానని సుమంత్ రీట్వీట్ చేశాడు. తాజాగా, సుమంత్ చేసిన ట్వీట్ తో ఇన్నాళ్లుగా వ‌స్తోన్న పుకార్ల‌కు తెర ప‌డిన‌ట్ల‌యింది.