కార్తి సినిమాకు సందీప్ కిషన్ సీక్వెల్

తమిళ హీరో కార్తికి తెలుగులో ‘ఆవారా’ సినిమా మంచి ఆరంభాన్నిస్తే.. అతడికి మరింత మంచి ఫాలోయింగ్ వచ్చేలా చేసిన సినిమా ‘నా పేరు శివ’. పెద్దగా అంచనాల్లేకుండా విడుదలైన ఈ సినిమా అప్పట్లో తెలుగులోనూ మంచి విజయం సాధించింది. టీవీలో కూడా ఈ సినిమాకు మంచి ఆదరణ దక్కింది. ఎప్పుడు షో పడ్డా జనాలు ఆసక్తిగా చూస్తుంటారు. చాలా సింపుల్ గా ఉంటూనే బలమైన ముద్ర వేస్తుందీ సినిమా. ఇప్పుడీ సినిమాకు సీక్వెల్ తెరకెక్కుతుండటం విశేషం. కానీ ఆ చిత్రంలో హీరో కార్తి కాదు. మన తెలుగు హీరో సందీప్ కిషన్. నా పేరు శివ (తమిళంలో నాన్ మహాన్ అల్లా) దర్శకుడు సుశీంద్రనే ఈ చిత్రాన్ని రూపొందిస్తున్నాడు.

తెలుగులో వరుసగా ఎదురు దెబ్బలు తిన్న సందీప్ కిషన్.. కొన్నాళ్లుగా తమిళ సినిమాలపై ఫోకస్ పెట్టాడు. అతను ఒకేసారి అక్కడ మూడు సినిమాలు కమిటయ్యాడు. అందులో ఒకటి ‘నగరం’. అది ఈ రోజే ప్రేక్షకుల ముందుకొస్తోంది. మరోవైపు నిర్మాణం నుంచి దర్శకత్వంలోకి వచ్చిన సీవీ కుమార్ తో ‘మాయవన్’ అనే ఇంకో థ్రిల్లర్ మూవీ చేస్తున్నాడు సందీప్. దీంతో పాటుగా సుశీంద్రన్ దర్శకత్వంలో సినిమా కూడా గత ఏడాదే మొదలుపెట్టాడు. ఈ చిత్రం కూడా పూర్తి కావస్తోంది. ఇది ‘నా పేరు శివ’ లైన్లో ఉండే సినిమా అని.. దానికి కొనసాగింపులా ఉంటుందని ఇటీవలే ఒక ఇంటర్వ్యూలో సుశీంద్రన్ తెలిపాడు. మరి కార్తి అదరగొట్టిన సినిమాకు సీక్వెల్ గా వస్తున్న చిత్రంలో సందీప్ ఎలా పెర్ఫామ్ చేశాడో చూడాలి.

Like Us on Facebook : https://www.facebook.com/Tupakidotcom/