సునీల్‌ కి అలాగైనా క‌లిసొచ్చేనా?

హాస్య‌న‌టుడు నుంచి క‌థానాయ‌కుడుగా ట‌ర్న్ తీసుకున్న సునీల్‌.. ఆరంభంలో హీరోగా రెండు వ‌రుస విజ‌యాలు ద‌క్కించుకున్న‌ప్ప‌టికీ ఆ త‌రువాత అనుకున్నంత ట్రాక్ రికార్డ్‌ని మెయిన్‌టెయిన్ చేయ‌లేక‌పోయాడు. అయిన‌ప్ప‌టికీ క‌థానాయ‌కుడిగానే ప్ర‌య‌త్నాలు చేస్తూ విజ‌యం కోసం చ‌కోర‌ప‌క్షిలా ఎదురుచూస్తున్నాడు. ఈ ఏడాది ఆరంభంలో సునీల్ నటించిన 'కృష్ణాష్ణ‌మి' ఘోర ప‌రాజ‌యం సాధించిన‌ప్ప‌టికీ.. చేతిలో మూడు చిత్రాల‌తో బిజీగా ఉన్నాడు. ఆ మూడింటిలో ఒక‌టి 'జ‌క్క‌న్న‌'. అప్పుడెప్పుడో 'ర‌క్ష' అనే హిట్ చిత్రాన్ని అందించిన వంశీకృష్ణ ఆకెళ్ల సుదీర్ఘ విరామం త‌రువాత ఈ సినిమాని తెర‌కెక్కిస్తున్నాడు. ప్రియాంకా చోప్రా క‌జిన్ మ‌న్నారా చోప్రా ఇందులో హీరోయిన్‌.

ఈ చిత్రం ఆడియోను ఈనెల 24న రిలీజ్ చేసి జులైలో సినిమాను విడుద‌ల‌ చేయనున్నారు. అదే గ‌నుక జ‌రిగితే సునీల్ కి సెంటిమెంట్ ప‌రంగా  వర్కవుట్ అయ్యే సూచన వుంది. అదెలాగంటే.. సునీల్ హీరోగా న‌టించిన  చిత్రాల‌లో పెద్ద హిట్ అయిన 'మ‌ర్యాద రామ‌న్న' విడుద‌ల‌య్యింది కూడా స‌రిగ్గా జులైలోనే. మ‌ళ్లీ ఆరేళ్ల త‌రువాత అదే నెల‌లో వ‌స్తున్న 'జ‌క్క‌న్న' సునీల్ కి మ‌రో విజ‌యం ఇస్తుందేమో చూడాలి.

కొస‌మెరుపు ఏమిటంటే.. 'మ‌ర్యాద రామ‌న్న' ద‌ర్శ‌కుడు రాజ‌మౌళి ముద్దు పేరు జ‌క్క‌న్న కావ‌డం. అతని డైరెక్షన్లో తెరకెక్కిన 'మ‌ర్యాద రామ‌న్న‌'లాగ.. ఇప్పుడు వస్తున్న 'జ‌క్క‌న్న‌' కూడా జులై సెంటిమెంట్ ను సునీల్ కి కలిసొచ్చేలా చేస్తుందేమో చూడాలి.