ఆ డైరెక్టర్ పవర్ స్టార్ సినిమా ఇంకెప్పుడు స్టార్ట్ చేస్తాడు..?

టాలీవుడ్ డైరెక్టర్ సురేందర్ రెడ్డి ఎట్టకేలకు రెండేళ్ల తర్వాత తన కొత్త సినిమా ప్రారంభించేందుకు సన్నద్ధం అయిపోయాడు. అక్కినేని యువహీరో అఖిల్ హీరోగా సురేందర్ రెడ్డి సినిమా ఈ వారంలో మొదలు కాబోతుంది. దాదాపు సైరా నరసింహరెడ్డి సినిమా తర్వాత రెండేళ్లకు మరో సినిమా చేయనున్నాడు సురేందర్. ఇప్పటికే అఖిల్ స్క్రిప్ట్ రెడీ చేసి సిద్ధంగా ఉన్నాడు. మొన్నటి వరకు అసలు సినిమా ఎవరితో చేస్తాడో క్లారిటీ ఇవ్వని సురేందర్ సడన్ గా అఖిల్ తో సినిమా ఖరారు అయిందని షాకింగ్ న్యూస్ చెప్పాడు. ఏకే ఎంటర్టైన్మెంట్స్ బ్యానర్ పై తెరకెక్కనున్న ఈ సినిమా ఫుల్ లెన్త్ యాక్షన్ కామెడీతో రూపొందనుంది. ఈ వారం ఏప్రిల్ 8న అఖిల్ పుట్టినరోజు సందర్బంగా సురేందర్ రెడ్డి సినిమా ప్రారంభం చేయనున్నారు.

ఇదిలా ఉండగా.. పవర్ స్టార్ పవన్ కళ్యాణ్ ప్రస్తుతం వరుస సినిమాలతో జోరు కొనసాగిస్తున్న సంగతి తెలిసిందే. ఇప్పటికే వకీల్ సాబ్ సినిమాను విడుదలకు సిద్ధం చేసాడు. అలాగే క్రిష్ దర్శకత్వంలో 'హరిహర వీరమల్లు'తో పాటు మలయాళం అయ్యప్పనుమ్ కోషియం తెలుగు రీమేక్ సినిమాలు గ్యాప్ లేకుండా ఫినిష్ చేస్తున్నాడు. ఆ సినిమాల తర్వాత హరీష్ శంకర్ తో సినిమా ఉంటుందని తెలిసిందే. అయితే తాజాగా పవన్ కళ్యాణ్ సురేందర్ రెడ్డి కథకు ఓకే చెప్పినట్లు పుకార్లు చక్కర్లు కొడుతున్నాయి. మరి ఎంతవరకు నిజమో తెలియదు కానీ పవన్ కోసం పవర్ ఫుల్ స్క్రిప్ట్ ఒకటి రెడీ చేస్తున్నాడట సురేందర్. ఈ ఏడాదిలోనే ఆ సినిమా కూడా పట్టాలెక్కించే ఆలోచనలో ఉన్నాడట. ఓవైపు అఖిల్ సినిమాతో బిజీ కాబోతున్నాడు. మరి పవన్ తో సినిమా ఎప్పుడనేది తెలియాల్సి ఉంది. చూడాలి మరి పవన్ తో సురేందర్ సినిమా ఉంటుందేమో!