‘సురేష్ ప్రొడక్షన్స్’లో ఆ క్లాసిక్ రీమేక్!

సురేష్ ప్రొడక్షన్స్.. తెలుగు సినిమా చరిత్రలో ఈ బేనర్ స్థానం ప్రత్యేకం. దాదాపు ఐదు దశాబ్దాల నుంచి ఇండస్ట్రీలో ఉన్న ఈ సంస్థ వందకు పైగా సినిమాలు నిర్మించింది. ఐతే ఒకప్పుడు విరామం లేకుండా వరుసగా సినిమాలు తీసిన సంస్థ.. ఒకప్పటి పెద్ద బేనర్లలాగే ఈ మధ్య జోరు తగ్గించేసింది. ఐతే తమ సంస్థకు ఉన్న మంచి పేరు దెబ్బ తినకూడదన్న ఉద్దేశంతోనే కొంచెం జోరు తగ్గించామని అంటున్నాడు సురేష్ బాబు. ప్రస్తుతం ప్రేక్షకుల అభిరుచి మారిపోయిందని.. దానికి తగ్గట్లు సినిమాలు తీయాలనే ఉద్దేశంతో ఆచితూచి వ్యవహరిస్తున్నామని.. ప్రస్తుతం తమ బేనర్లో మూడు సినిమాలు తెరకెక్కుతున్నాయని చెప్పాడు సురేష్. తమ సంస్థలో మైలురాయి అనదగ్గ ‘ప్రేమనగర్’ను రీమేక్ చేయడానికి కూడా సన్నాహాలు చేస్తున్నట్లు ఆయన వెల్లడించాడు.

‘‘మా వేగం తగ్గి ఉండొచ్చు కానీ విరామం తీసుకోలేదు. ప్రస్తుతం ప్రేక్షకుల అభిరుచి మారిపోయింది. కొత్త కథలనే ఆదరిస్తున్నారు. మా సంస్థకంటూ ఓ గుడ్ విల్ ఉంది. దానికి తగ్గట్లే సినిమాలు తీయాలి. ప్రస్తుతం మూడు చిత్రాలు తీస్తున్నాం. రవిబాబు దర్శకత్వంలో 'అదిగో' షూటింగ్ జరుపుకుంటోంది. ఇంతవరకు తెలుగులో ఇలాంటి కథతో సినిమా రాలేదు. యాక్షన్‌ నిండిన యానిమేషన్‌ సినిమా అది. సమ్మర్లో రిలీజ్ చేస్తాం. మా అబ్బాయి రానాతో ఓ యాక్షన్‌ సినిమా తీస్తున్నాం. అలాగే నాగచైతన్య హీరోగా ఓ సినిమా ఉంటుంది. ఆ చిత్రానికి రానా నిర్మాతగా వ్యవహరిస్తాడు. అలాగే ‘ప్రేమనగర్‌’ సినిమాను ప్రస్తుత కాలానికి తగ్గట్లు మోడర్నైజ్ చేసి సినిమా తీయాలనుకుంటున్నాం’’ అని సురేష్ తెలిపాడు.

Like Us on Facebook : https://www.facebook.com/Tupakidotcom/