ఇద్దరు విజయ్ ల దారిలోనే సూర్య కూడా!

ఈ ఏడాది చివర్లో ఇద్దరు క్రేజీ హీరోలు పొలిటికల్ థ్రిల్లర్స్ తో వచ్చారు. విజయ్ దేవరకొండ నోటా డిజాస్టర్ కాగా విజయ్ సర్కార్ వసూళ్ల పరంగా సేఫ్ గా మిగిలినా కంటెంట్ పరంగా యావరేజ్ అనే ముద్రే వేయించుకుంది. అంతకు ముందు ఏప్రిల్ లోనే మహేష్ బాబు భరత్ అనే నేనుతో సందడి చేసి వంద కోట్ల బొమ్మ భరత్ అనే నేను ఫాన్స్ కు గిఫ్ట్ గా ఇచ్చాడు. ఇప్పుడు మరో హీరో కూడా ఇదే దారిలో ఉన్నాడు.

సూర్య హీరోగా రూపొందుతున్న ఎన్జికె(నంద గోపాల కుమార)షూటింగ్ ప్రస్తుతం శరవేగంగా సాగుతోంది. సాయి పల్లవి - రకుల్ ప్రీత్ సింగ్ లు హీరోయిన్ గా నటిస్తున్న ఈ మూవీకి సెల్వ రాఘవన్ దర్శకత్వం వహించడం ప్రత్యేక ఆకర్షణగా నిలుస్తోంది. ఆ మధ్య విడుదల చేసిన పోస్టర్స్ మంచి స్పందన దక్కించుకున్నాయి. లేటెస్ట్ అప్ డేట్ ఏంటంటే ఎన్జికె సైతం పక్కా పొలిటికల్ మూవీనట. ఒక అతి సామాన్యుడు రాష్ట్ర రాజకీయాలను శాశించే బలమైన శక్తిగా ఎదగడాన్ని ఇందులో చూపించబోతున్నారట. సర్కార్ తరహాలోనే వర్తమాన రాజకీయాలను టచ్ చేసినప్పటికీ ఇందులో మసాలా ఇంకాస్త ఎక్కువే ఉంటుందట. సాయి పల్లవికి మరో ఛాలెంజింగ్ పాత్ర దక్కిందని సమాచారం.

యువన్ శంకర్ రాజా సంగీతం అందిస్తున్న ఈ మూవీని తెలుగు వెర్షన్ కూడా ఒకేసారి విడుదలకు ప్లాన్ చేస్తున్నారు. ముందు సంక్రాంతి అనుకున్నారు కానీ తీవ్రమైన పోటీ నేపథ్యంలో డ్రాప్ అయ్యారు. మరి ఈ ఎన్జికె సూర్య చాలా కాలంగా ఎదురు చూస్తున్న బిగ్ బ్రేక్ అవుతుందా లేదా వేచి చూడాలి. ఈ ఏడాది సంక్రాంతికి వచ్చిన గ్యాంగ్ ఆశించిన ఫలితాన్ని ఇవ్వలేని నేపథ్యంలో అభిమానుల అంచనాలన్నీ ఎన్జికె మీద భారీగా ఉన్నాయి