సూర్య వచ్చేదీ పెద్ద పండగకేనట..!

తెలుగునాట సంక్రాంతికి మించిన పండగ మరోటి లేదు. సంక్రాంతి సంబరాలలో మునిగితేలే జనాల ముందుకు కొత్త సినిమాలు వచ్చి ఆ సంతోషాన్ని రెట్టింపు చేస్తాయి. మన అగ్ర హీరోలు కూడా ఆమేరకు సంక్రాంతి బరిలో నిలవాలని ముందే ప్లాన్ చేసుకుంటారు. అవి విజయం సాధిస్తే నిర్మాతలు కూడా పండగ ేసుకుంటారు. ఇదీ వున్నమాటే. కొత్త మాట ఏమిటంటే... ఈ సారి సంక్రాంతి బరిలో పందెం కోడిలా నేనూ దిగుతాను అంటున్నాడు సూర్య.

మనం వంటి సూపర్ హిట్ సినిమా తర్వాత విక్రం కుమార్ సూర్య హీరోగా దర్శకత్వం వహిస్తున్న సినిమా 24. సమంత హీరోయిన్ గా నటిస్తున్న ఈ సినిమా ముందు చెప్పిన ప్రకారం అయితే డిసెంబర్ నాటికే తెరమీదికి రావాల్సుంది. ఏమైందో ఏమో గానీ ఇప్పుడు సంక్రాంతి సినిమాల లిస్టులో చేరింది. తెలుగులో సూర్యకు అగ్ర హీరోలతో సమానమైన మార్కెట్ వుంది. ఇది సరిపోదన్నట్టు కుర్ర హీరో నితిన్ ఈ సినిమాని తెలుగులో విడుదల చేస్తున్నాడు. ఇప్పటికే సంక్రాంతి లిస్టులో పవన్ 'సర్దార్', మహేష్ 'బ్రహ్మోత్సవం' తోపాటు మరికొన్ని సినిమాలు చేరాయి. తెలుగు సినిమాకి వ్యాపార పరంగా సంక్రాంతి పెద్ద సీజన్. దానికోసం మనవాళ్ళే నానా కష్టాలు పడి ఒకరికరు సహకరించుకుంటూ ఓ రోజు అటుఇటుగా సినిమాలు విడుదల చేస్తుంటారు. సూర్య కూడా పెద్ద పండగకే వస్తానంటే ఎలా.. హౌ..?