సరిలేరు - అల.. పోటా పోటీ పోస్టర్లపై తమ్మారెడ్డి ఫైర్

సంక్రాంతి రేస్ లో దిగిన సరిలేరు నీకెవ్వరు - అల.. వైకుంఠపురములో సినిమాలు పోటాపోటీగా ప్రదర్శించబడుతున్నాయి. రెండు సినిమాలకు చెప్పుకోదగ్గ విజయం దక్కింది. ఎవరికీ వారు సరికొత్త రికార్డులు సృష్టిస్తూ మంచి జోరుమీదున్నారు. దీంతో ఈ రసవత్తర పోటీలో ''మా సినిమా అంటే మా సినిమానే విజేత'' ఎవరికీ వారు గొప్పలకు పోతున్నారు. ఇటు మహేష్ టీం ఇండస్ట్రీ బ్లాక్ బస్టర్ అంటుంటే.. ఇటు అల్లు అర్జున్ టీం శాంతి విన్నర్ గా చెప్పుకుంటోంది.

ఈ నేపథ్యంలో రెండు సినిమాల కలెక్షన్ల పోస్టర్లు సోషల్ మీడియాలో తెగ హంగామా చేస్తున్నాయి. సగటు ప్రేక్షకుడు కూడా ఈ రెండు సినిమాల్లో అసలు విజేత ఎవరనేది తెలియక తలపట్టుకుంటున్నాడు. ఈ పరిస్థితుల్లో తన సోషల్ మీడియా ఖాతా ద్వారా ఓ వీడియో పోస్ట్ చేస్తూ ఈ రెండు సినిమాల యూనిట్ సభ్యులపై ఫైర్ అయ్యారు సీనియర్ నిర్మాత తమ్మారెడ్డి భరద్వాజ.

''మా హీరో గ్రేట్ అంటే.. మా హీరోగ్రేట్ - మా సినిమా హిట్ అంటే.. మా సినిమా హిట్'' అని చెప్పుకుంటూ ఎందుకిలా కొట్టుకోవడం అంటూ ఓ వీడియో ద్వారా ఫైర్ అయ్యారు తమ్మారెడ్డి. అంతేకాదు బాహుబలి తర్వాతేగా మీ ఇద్దరూ.. బాహుబలి దాటితే అప్పుడు మాట్లాడండి అంటూ వారిని హెచ్చరించారు. ''రెండు సినిమాలు హిట్టే కదా! ఎందుకురా అలా కొట్టుకుంటారు. ఇద్దరు స్టార్ హీరోల సినిమాలు సూపర్ హిట్ అయ్యాయి కాబట్టి చాలా హ్యాపీగా ఉండాలి కానీ ఇలా మీకిదేం పోయేకాలం అంటూ ఆగ్రహం వ్యక్తం చేశారు తమ్మారెడ్డి. ప్రస్తుతం ఈ వీడియో వైరల్ గా మారడమే గాక సినీ వర్గాల్లో చర్చనీయాంశం అయింది.