కీరవాణి రిటైరవ్వాలని తమన్ కోరుకున్నాడా?

మూడేళ్ల కిందట తాను 2016 చివర్లో రిటైరవ్వబోతున్నానని సంగీత దర్శకుడు కీరవాణి ప్రకటించినపుడు అందరూ ఆశ్చర్యపోయారు. అవకాశాల్లేక సంగీతానికి సెలవిచ్చేయడమే తప్ప ఇలా ఓ మ్యూజిక్ డైరెక్టర్ రిటైర్మెంట్ ప్రకటించడం ఇంతకుముందెన్నడూ విని ఎరుగం. ఐతే కీరవాణి లాంటి సంగీత దర్శకుడు రిటైరవ్వాలని సంగీత ప్రియులు కోరుకోరు. ఆయన ఆ నిర్ణయం ప్రకటించినపుడు చాలామంది వ్యతిరేకించారు. ఆయన్ని సినిమాల్లో కొనసాగమనే అన్నారు. ఐతే స్టార్ మ్యూజిక్ డైరెక్టర్ తమన్ మాత్రం కీరవాణి రిటైరైపోతే బాగుండు అన్నట్లే చూశాడట. ఈ విషయాన్ని కీరవాణే స్వయంగా వెల్లడించడం విశేషం.

తమన్ గురించి కీరవాణి నెగెటివ్ గా ఏమీ మాట్లాడలేదు కానీ.. తన రిటైర్మెంట్ మీద ఎవరికీ లేనంత ఆసక్తి తమన్ కు కలిగిందని ఆయన అన్నారు. తమన్ స్వయంగా తన అభిమానే అని.. ఐతే తాను రిటైరైపోతే తన దగ్గర కంపోజర్ గా పని చేసే జీవన్ ను తన దగ్గర పెట్టుకుందామనే ఉద్దేశంతో తమన్ తన రిటైర్మెంట్ మీద ఆసక్తి ప్రదర్శించినట్లు కీరవాణి వెల్లడించాడు. ‘ఈ రోజుల్లో’.. ‘బస్ స్టాప్’.. ‘ప్రేమకథా చిత్రమ్’.. ‘లవర్స్’.. లాంటి సినిమాలకు సంగీతం అందిస్తూనే.. మరోవైపు కీరవాణి దగ్గర అసిస్టెంట్ గా కొనసాగుతున్నాడు జీవన్. అతను మంచి కంపోజర్ అని.. అందుకే తన రిటైర్మెంట్ ఖాయమైతే తన దగ్గర పెట్టుకుందామని తమన్ చూశాడని కీరవాణి వెల్లడించాడు. ఈ విషయమై జీవన్ నుంచి ఎప్పటికప్పుడు అప్ డేట్స్ తెలుసుకునేవాడని కీరవాణి అన్నాడు. ఐతే తమన్ ఆశల మీద నీళ్లు చల్లుతూ తన రిటైర్మెంట్ నిర్ణయాన్ని కీరవాణి వెనక్కి తీసుకున్న సంగతి తెలిసిందే.


Like Us on Facebook : https://www.facebook.com/Tupakidotcom/