బుడతకు దొరికేసిన టైగర్

అతడో సెలబ్రిటీ.. దశాబ్దాలుగా బాలీవుడ్ లో కొనసాగుతున్న స్టార్ హీరోకు వారసుడు. త్వరలో స్టార్ స్టేటస్ అందుకుంటాడనే అంచనాలున్నాయి. ఇంత ఖ్యాతి ఉన్నా.. ఈ హీరో లోకల్ ట్రైన్ లో ప్రయాణిస్తుంటే.. ఒక్కరంటే ఒక్కరు కూడా గుర్తు పట్టలేదు. ఇంతకీ ఇతనెవరో అర్ధమైందా.. బాలీవుడ్ హీరో టైగర్ ష్రాఫ్.. గత పది రోజులుగా లోకల్ రైల్ లో ప్రయాణం చేస్తున్నాడు.

మున్నా మైఖేల్ అనే మూవీలో నటిస్తున్నాడు టైగర్ ష్రాఫ్. ప్రస్తుతం ఈ సినిమా కోసం వాసాయ్ దగ్గర నేషనల్ హైవేపై యాక్షన్ ఎపిసోడ్స్ చిత్రీకరిస్తున్నారు. ఇక్కడికి వెళ్లేందుకు గాను.. లోకల్ రైల్ ను ఆశ్రయిస్తున్నాడు టైగర్ ష్రాఫ్. తలకు హుడీ తగిలించి.. ముఖానికి కర్చీఫ్ కట్టుకుని.. సైలెంట్ గా జర్నీ చేసేస్తున్నాడు. 10 రోజుల పాటు ప్రయాణించినా ఎవరూ గుర్తు పట్టకపోవడం ఆశ్చర్యమే కానీ.. ఓ బుడతడు మాత్రం గుర్తు పట్టేశాడట. షూటింగ్ పూర్తి చేసుకుని ఇంటికెళుతున్న టైంలో.. ఓ చిన్నారి "మీరు టైగర్ ష్రాఫ్ కదూ" అని అడిగేశాడట.

ఆ సమయంలో ట్రైన్ లో పెద్దగా జనాలు లేకపోవడంతో.. ముసుగు తొలగించిన ఈ హీరో.. కాసేపు ఆ చిన్నారితో కబుర్లు చెప్పానంటున్నాడు. ఒకటి కాదు.. రెండు కాదు.. 10 రోజుల పాటు తననెవరూ గుర్తు కూడా పట్టలేదని స్వయంగా చెప్పి అందరినీ ఆశ్చర్య పరిచాడు టైగర్ ష్రాఫ్.

Like Us on Facebook : https://www.facebook.com/Tupakidotcom/