త్రివిక్రమ్ - రామ్ - వెంకీ.. ఓ సినిమా!

తెలుగు సినిమా ఇండస్ట్రీలోని అగ్ర దర్శకుల్లో ఒకరు త్రివిక్రమ్ శ్రీనివాస్. జేబులో ఒక పెన్నుతో వచ్చి ఇండస్ట్రీ తలుపు తట్టిన త్రివిక్రమ్.. చరిత్రలు తిరగరాశాడు అదే కలంతో. కెప్టెన్ ఆఫ్ ది షిప్ గా సెకండ్ ఇన్నింగ్స్ మొదలు పెట్టి సెంచరీల మీద సెంచరీలు కొడుతున్నాడు. ఇప్పుడు ఒక సినిమాకు ఏకంగా రూ.20 కోట్ల రెమ్యునరేషన్ తీసుకునే రేంజ్ కు ఎదిగాడు ఈ స్టార్ డైరెక్టర్. ఆయన సినిమాలంటే ఆడియన్స్ లో ఉన్న క్రేజ్ అలాంటిది మరి.

అయితే.. అగ్రదర్శకుడిగా ఎదిగినప్పటికీ ఇతరులకు అవసరమైన సందర్భాల్లో తన ‘పెన్’ ఇస్తూనే ఉన్నాడు ఈ మాటల మాంత్రికుడు. దానికి గట్టిగానే ఛార్జ్ చేస్తున్నప్పటికీ.. ‘మన కథ ఇప్పుడు వేరులే’ అని అనుకోవడం లేదు త్రివిక్రమ్. తన సినిమాలు డైరెక్ట్ చేస్తూనే.. తనలోని రైటర్ ను సమాంతరంగా నడిపిస్తున్నాడు. ఈ క్రమంలోనే తన శిష్యుడు వెంకీ కుడుముల కోసం ఓ కథ సిద్ధం చేశాడట త్రివిక్రమ్.

త్రివిక్రమ్‌ మూవీ ‘ఆ.. ఆ’కు అసిస్టెంట్ డైరెక్టర్ గా పనిచేశాడు వెంకీ కుడుముల. ఆ తర్వాత నాగ శౌర్య హీరోగా వచ్చిన ‘చలో’ మూవీతో దర్శకుడిగా మారాడు. సాఫ్ట్ హిట్ అయిన ఈ చిత్రం తర్వాత.. నితిన్ హీరోగా ‘భీష్మ’ చిత్రాన్ని తెరకెక్కించాడు వెంకీ. ఈ చిత్రం కూడా పెద్ద విజయాన్ని సాధించింది. ఇప్పుడు తన మూడో చిత్రం ఎనర్జిటిక్ హీరో రామ్ తో ప్లాన్ చేశాడట వెంకీ. ఈ సినిమాకు త్రివిక్రమ్ కథ సిద్ధం చేశాడని టాక్.

హీరో రామ్ లేటెస్ట్ మూవీ ‘రెడ్’ సంక్రాంతికి విడుదల కాబోతోంది. ఈ చిత్రం తర్వాత.. వెంకీ కుడుముల డైరెక్షన్ లో త్రివిక్రమ్ అందిస్తున్న కథలో నటించబోతున్నాడు రామ్. మరి, ఇందులో హీరోయిన్, ఇతర నటులు, టెక్నీషియన్స్ గురించి తెలియాల్సి ఉంది. ఈ మేరకు త్వరలో అధికారిక ప్రకటన విడుదలయ్యే అవకాశం ఉందని సమాచారం.